تحترينه ..
والثواني مرّته تسألْه : وينه ؟

تحترينه
لين تبرْد شمس عينه

.. من حنينه !

لا .. ياسلمى

حبّه اسمى

ماشرب دمعه .. بــ يظما !

غير مرّه جفّ مزن ,

وسال دُخّان المدينه !

*** *** ***

نازفة حبّي

.. وقلبي
والهوى ماشحّ قَطْرَه


فِطْرَة الحب الشجيّ .. تكبر معي
والحب فِطْرَه !



آآه آآه آآه

آهـ منّك .. آهـ منّي

لامتى مرسى التمنّي

يطعن ضلوع السفينه ؟

والبحر قارِسْ !

وليل البحر غارِسْ

خنجر الامواج في صدْر النوارِسْ !

كل نورس / فيك سلمى

..سلمى .. سلمى

.. سلمى .. سلمى

وينه الماء ؟ قلبي اعمى

يانوارسكْ الحزينه

لمّي اطراف الشواطي ..

من بلاطي .. كلمتين

واتركي الشاطي .. ورايه

وارحلي مع بيت طين !

ياحزن هاك الـم / شاعر ..

يام / شاعر هـ الحزين !!



*** *** ***


إيــه ياسلمى

موقدانفاسك شعلْني

قبل إحساسك .. يصلْني !

وافرضي ان واحد سألْني :

كيف صدق الاقنعه يكتشف زيف الحقيقه ؟

بالله شوفي لي طريقه

وعلّميني لـ اختزلتي

اطول دروبي مسافه

شلون اخافه .. وانتي اصلاً ماوصلتي !

ياحسـافه ..




من رحلْتي

ياقريبه ..

وابعد من اصداء نجمٍ بعد حفلَه !

يادلع طفله .. وحيدة والديها

.. بسّ طفله

عاشقك جمّر حنينه

صدق لو انك تبينه

... تحترينه

لو قضى نحْبه وعاشت لك سنينه


تحترينه

يوم تعطينه مساك
وفي صباحك تأخذينه !

وان تمادى قلب سلمى

يحتريك

أو تحترينه !!

رغم الوضوح اللّي ملا عارض الغيم
........ مازلت ممطر في حشايه قصيده
استنبتك تحت المعاليق .. للديم
........ واقرب عن انفاسي ... مسافه بعيده !!

إخضرار الشوارع
.......... ماملاني حنين
احسب الوقت زارع
.......... في سنيني .. سنين
فرحة انسان جايع
.......... يحسب العمر .. تين !
لاتهزّ الاصابع
.......... مابقالي .. يدين
كل يومين طالع
.......... من عروقي حزين
شاب حمل المدامع
.......... وارهقت كل .. عين
لو تجفّ المنابع
.......... بـ اقطف الياسمين !

اوقف مسير الظلم لو انّك اعزل
........ دباّبة العدوان ماتزرع إقدام !


وافتح ضلوع الصدر للموت ..ينزل
........ على بطون الخوف .. والذلّ ظلاّم

عيّا طريق الشوق يمشي لآخرك
............ واولك بُعد وضيق واسلاك شايك !

نامت جفون امسي على حلم باكرك
............ مع صوت يزهمني وانا اقول : جايك

على الاقلّ اليوم يجرحني اكثرك
............ ورى حنين النور فوق الارايك

عجزت من حيلي على حيلي اقدرك
........... قصة ذهب يصدأ بلمعة سبايك

آسف حبيبي : لو بعد كنت فاكرك
............ نسيان درب الشوق بلحيل شايك

وش بقى في القلوب وموج الاشواق هادر
.......... حزّةٍ جات بين الروح واعماق سلمى !

اكتسي بالشروق وليل الاحلام ... غادر
.......... لو سترت المواني .. ماستر عيني .. الما

سلمى لاتتركيني .. للقصيد النوادر
.......... كل ماجبت بيتٍ للحزين .. اكسب اثما

اذكره فيك وانسى بانّي اصلاً مٌغادر
.......... واحطب العمر واشعل للمواليف ظلما

ضاقت الدنيا على القلب الرحيب
........ حتى عود الوقت / وقت وينثني

العمر شمسٍ تهادى .. للمغيب
........ياغزير الشيب تكفى ردّني

للزمن والناس والخلّ الحبيب
........ والنشاط اللّي هواه يهزّني

ياغزير الشيب : هل حان المشيب ؟
........ ماتحنّ بحال : شايب منحني

ان غدى قلب المروّه .. قلب ذيب
........ من نحاس الناس .. يظهر معدني !

هو يستحيل النوم من مقلة العين
.......... او انّ غفوات القهر حسْب الامكان !

من يحبس احلامه ورى خاطري .. مين ؟
.......... ومن يطلق جنوني معه .. خلف قضبان

ياليتني شدّيت حبل العنـ وين ــا
.......... ولاصار لـ كتاب الغرابيل .. عنوان !

مثل الامل مبطي يمارس بي الطين
.......... من فوّهة ثلجٍ يبي يغيظ .. بركان

وش اصعب من السجن .. لولا المساجين
.......... لاصار وسط السجن رجّال .. له شان

يادروبه
واثرنا ظلما عروبه
في خطاوينا
... للشوائب وجه داكن
لكن اجمل في شحوبه !
للثرى : طارت ملامه
شامخه تحت الاماكن !
مالقت حتّى قمامه
فاضيه جنب المساكن !
وينها روح العروبه ؟
وينها روح العروبه ؟
واصلاً : اقصى شي نستنكر ونشجب في عذوبه !
يالهذا الليل قصّه
مانتهت رغم البدايه
باقيِ في الحلق غصّه
والجروح اللّي بحشايه !
يالهذا الليل معنى .. ان حضر وان غاب .. معنا
والمرايه .. ماتبالي .. لوتجيب وجيه منّا!
هي كثير ... وقلّها فعلاً كثير ..
هي كثير
اقلّها : شوف الضرير اللّي في بالي !
هي فلسطين الضحيّه
تنقتل وتعيش فيّه !!
ماعليّه ..
لوبكيت سنين .. والعين محجوبه !
راضي بدمع العروبه
لو فلسطين مغصوبه !!

ماعاد لي قلبٍ حبيس النّور
......... يشتاق للهجران فـ غنايه
بدا يجمّر صالي الديجور
......... لاصمّل الساري على رايه
مرْني صباح وسنْبل وعصْفور
......... ولاحدٍ حكالي عنّي .. حكايه !
مـ اخترت اكون الخاطر المكسور
......... كانت وسيله برّرت .. غايه
حتّى صباح القارب المهجور
......... قصّ البعيد .. اخباره الجايه !
سولف : ضباب وموعدٍ مهجور
......... لـ ضْفاف نهْـر وساحل منايه
ياصاح : مادام الزمان يدور
......... لاتهت ؟ .. قبلك واحدٍ تايه !!

لاتهت ؟ ... قبلك واحدٍ تايه
لاتهت ؟ ... قبلك واحدٍ تايه
لاتهت ؟ ... قبلك واحدٍ تايه

باب الزمن واقف على درفة مسافات الثواني
........... من قُربه : اشعر بالسنه .. عقرب ثرى .. تلدغ ثريّا !

عيني بعينك ياصبر : عنّيت رجلي في مكاني
........... وَصَلْت اراوح بيني وبينك / وخطواتي .. هنيّا

ياليتني لاشبْت ماشيّب ولي بعض الاماني
........... لاقلّوا الاحباب من زوّادة القلب .. اتـّـــهيـّـا !

ناديت باصوات السنين السود : جدران المباني
........... ماردّ طين الراحلين .... وحاجتي تملا يديّا

خلّوني اعيش بزمانٍ جاهلي .. ماهو زماني
........... كلْ مازهمت الجرح في حاجة سؤالي قال : هيّا !

برحل مع الذكرى .. سفير احلام .. متغرّب عشاني
........... وان جبت للحلم المقفّي ( حلم ) ثاني منه : عيّا !!

مال الزمن .. غيري زمن .. والعمر ماسدّ بمكاني
........... ان غبت لاتبكين : ياعيني عليّه / هي جفيّا !!

الوجوه :
اللّي مع اطراف السكوت ..
ماتلتقي في رحلة الجايين .. صوت !
والرايحين بناس مامعهم دليل
واللّي مع الجرّه تتوه !
من هو دعاها لاتموت ؟
في قمّة غناها ..
وهي في ذمّة الكهف بـ تسير ..
ولا احدٍ جاها !
ينقذ الباقي من الظلّ .. ويطير
تحت عيون الكلّ .. واجفان النهار
لا ماعلى خلّك ملام ..
المساء : يخطف من احلامه .. نهار !
ماهو نهار اليوم / يوم ( اكهف ) منام !!
واحلام تتشقّق عليك ..
تستنطقك صوتٍ يبيك !
ماهو انا :
اكيد .. اكيد .. ماهو انا
او انت !
او حتّى يديك !
هذا إهو : وجه النهار اللّي غدى
بين الوجوه ...
ماعلّموه :
ان الصدى ... ماهو على خُبْر السنين
مخفي : مثل ذكرى / ورى الذكرى يبين !
لاهو رجع صوته مع الايام / صوت
ولاهو نسى كلّ الوجوه
اللّي على باله تموت

ياصاحب الظلّ الطويل
............ شمس الطريق مطوّله !
تعطيك من دربك .. قليل
............ وخطواتها .. متسوّله
مـ اشفق عليك الليل .. ليل
............ من نفسك المتحوّله
مرحلك .. توبير النخيل
............ وآخرك ماراح اوّله
من علّم البارح .. يحِيل
............ بين الضلوع معوِلّه ؟
يكسر سنا الضلع الصقيل
............ ويشبّ فكرٍ لي .. وله !
انت .. انت مع نفسك خليل
............ تطمين نفس مهوّله
ياذا القريب المستحيل
............ في روحي المتجوّله
مالي بدل شعري بديل
............ وابيات ماهي مقوّله
ماكنت عن عمري بخيل
............ يمنى الكريم تنوّله
ان جيتني .. راعي جميل
............ ماخاب راع الاوله
وان جيت .. من حالك .. ثقيل
............ في غيّ نفس مموّله
اصرخ .. يطاولك العويل !
............ ولاطحت منه .. ارق .. اوّله !

قوم انطفي ضَـوح !

تفوح

تفوح

تفوح

شقّق جدار الوله صورة العشق التليد
................ كلّ ماطشّ الزمن .. روح غيّابي .. عليّ
امس لفّيت المواني .. وانا ساري بعيد
................ من يدي طارت قصيده على قلبٍ خلي !
من ضحك باكي ؟ ومن يبكي وقلبه سعيد ؟
................ اشتهي موتي غرَق وسط همٍّ ممتلي !
يا اقدم جدار انتظاري .. ترى مابه جديد
................ لاعطيت العمر ( وقتي ) ولاظلّيت .. لي !
مبطي اسافر معك .. في مشاويري .. وحيد
................ نافذه لاطلّ منها .. سحابك ينجلي
ياعذابي ريح الايام صلفه ... تستزيد
................ كلّ خطوه تبتعد .. مقرُبه من مقتلي !
هوّ انا ماجيت من خاطري / خاطر عنيد
................ رحت مهجر للمدينه .. بمنفى منزلي !
آسف ... انْ كاني رحلت وبقى منّي نشيد
................ قلت اغنّي ... دامني في دروبك مبتلي !

يابلادي
والسهر ممحل وطرف السفر مايل
والعمر والاموات
من بينهم وادي !!
وانتي فيك ارواح شتّى .. بلاطايل !
ماتنادي في طريق العمر .. تايه
لو تشتّى مصيَف الصبر بـ عبايه
مو كفايه
نترك ارواح ونسافر
نترك الدنيا ونهاجر
مو كفايه
يهجر الحُلم المضاجع .. منافينا
وامانينا تخطف الحِلم .. المواجع .. من ايدينا !
ثم نغيب .. نغيب
في غيهب التخمين
هو بقى للحين
حملٍ رحم شايل !
ياحسافه دمعنا ..يضحك علينا !
ياموطني لاشاب .. يافع من العايل ؟
والفقر دافع .. قيمة العجز .... والمبدا
فارغ و تملا حاوية صمته .. الدمعه
كلّه كذا .. يندا على جمره السُمعه !
ياموطني حضنك خياراتي .. واحلامي
لاشفت غيري طال
وانا عليك اجدا !
ليه انده ايامي وصوت الرجاء امسى ..
عنده اذن من طين .. تبحر بلامرسى
سكّين .. تزهم وجه للقبله .. مسمّي
من يلتفت يمّي برغم اتجاهاتي
لو ينقطع في امانينا عجين امّي
ويعيش تحت الجمر .. منّي .. انا .. اثنين
واكثر بعد .. منّي بعد ... من مواليفي
من غايتي لاطاح ريش التعب .. مرقى !
واول شقا لاختار فيني نهاياته
مو هي حكاياته .. ولاهي حكاياتي
حكاية التأبين
لانسان ماهو ( انسان )
اللي بقى منّه ( لسان ) وجروح كثار
تهزّ صدر الثار .. ياجرح ( لاتصالح ) !
لو يشرب المالح قتيل الغدر فيني !
قد طال حبل الجرح .. ماعاد يمديني
كل شي .. ينبي عنه شيّ ... ورق حتّه
ريح الصبر والجوع
واشياء من حتّى !!

لاتختفي فـ اوضح معالمك .. بـ غموض
.......... الوقت بعض احيان .. مايشبه الوقت !

يا اعظم حبيبٍ فيه من وجهي .. رضوض
.......... اذا انصدمت ؟ ... انا من اجلك .. تعوّقت

من قبل يطلع في السماء .. للمساء .. نوض
.......... ضيّقت بعض الليل من كلّك ... وضقت !

لمحت في يدينك مطر ... عَـسِّــه الرّوض
.......... مدري فتح طاريك / عيني ... ودنّقت

ياخائضٍ مزْن الطواريق ... مفروض
.......... تثمر على غصن السطر .. لاتسلّقت !

الشوق : طيحة حيل بالحبّ منهوض
.......... وانا كذا مشتاق من يومي [إ] خْلِقـت !

مُـرهـق , وقالوا عنّي الناس : محظوظ !
.......... مرتاح باعينهم , وفي عيني : أُرْهـقْـت !

لاتندهش لاغبت ! .. ماغبت .. بغموض
.......... ريّحْـت من عُـمْـري [ سنه ] .. بسّ ... واشتقت !

بالله وش عُذر الكِبَرْ لامـن كُبَر .. فرق السنين ؟

وين رايح ؟ .. / .. وين رايح .. ياسديم الارض ؟

ياسراجها اللّي بـ سقف الليل مستلقي

..... ومعك تسافر الاطلال ... للريح .. للـموّال !

ياربّ كلّ الليال .. اوراق مسودّه
................ غُبّـة سطر , والقلم : مقري [ قرا ] كاتب !!
وامسٍ فهق شمس [ مطويّه ] على يدّه
................ ماراح نَـفْـرَة عزيزٍ [ ذلّ ] متجاذب
ارخى عديل السهر [ وسمه ] على خدّه
................ وصدّق عليه اعتراف الماضي .. الكاذب
بعد النهايه [ وصلت ] فـ اول المدّه
................ مدري [ بديت ] السلام ,, بـ راحة محارب !
حبيبتي : [ ربّة الياقوت ] .. واللدّه
................ [ ياقارئة وجهي ] المُكتظّ .. بـ معاتب !
جيت فـ عيونك [ رخاء ] في ساعة الشدّه
................ ورجعت : مدري من اكثر ,, [ من رجع خايب ]
جزر مماج الغرام وهاج بي ,, مدّه
................ وابحرت مثل الزمان في يومي ,, الهارب !
يابحر .. ناقص ضميري .. زود عن حدّه
................ لاتنقتل في عيوني .. واكسر القارب !!
في ذمّتك : ماانت [ لجّي ] يابحر جدّه
................ ضحكت منّي ,, ولامك دمعي الغاضب !
مادام صدّيت والصدّه هي الصدّه
................ القلب : [ قلب الذنوب ] ,, بـ قلبي التايب !
وان كان يابحر : فيك من العنا [ شَدّه ]
................ معزّبة جرحي : قامت معي بالواجب !!