من أروع الشعراء اللذين أحببت القراءه لهم
وأعذبهم ..

كلماته تلامس العواطف ..
وأسلوبه .. يجعلك تشعر .. بأن الكلمات كتبت لك .. :)
حتى تلامس جرحك ....!

أترككم مع قصائده

لـ تستمتعوا

نعم ألفين

مثل جمرهـ بكفي نارها وقّـد
مثل جرحٍ لبس فيني ثياب جداد



مثل حِـس المطر حبك
يجي فجأه بلا ميعاد
يجيني في سكون الليل
يجيني ويل
يجيني مثل نجم سهيل



عيونه تحضن عيوني
وقلبه صاير ٍ لي مهم


نعم مره
نعم ثنتين
نعم ألفين
نعم مليون



أحبك لو يصير الكون
حسود وعاذل ٍ مجنون
أحبك ليش لاتسأل
أحبك لنّك الأجمل
بعيني يابعد عيني




نعم والله أبي حبك
واحلف إني أنا احبك
ولكن بيننا حاجز وخوف وبرد
وعالم همها دايم تدوس الورد



نعم أبغاك تكون العشق بأوراقي
وابيك الحرف وابيك تكون لي مدادي



أبيك الناس وابيك إحساس
وابيك تكون لي معنى
وابي أحياه واقعنا



يامشغلني وانا توي أعرفك توْ
أنا ودي تشيل من عالمي هـ ( اللـو )
تكون أقرب من عروقي إلى عروقي
وتصبح ضحكه في شروقي
وكل اللي تبي بي سَـوْ



أنا روحك
أنا بوحك
أنا اللي في هواك آهيم
وابني عالي صروحك




أنا منك
وانا صدقك
وانا ظنك



وانا المكتوب في دنياك
وغيري مادرى عنك



أنا تاج الوفا المحسوس
وطوق العاشق الملبوس
وزهره مشرده في الريح
تبي تلمك تبي الدنيا تكون عيون
وانت النون وتضمك !





ياقطرة ما
أنا لي رأي في حبك
يقول إنك لقلبي مزون
روت كل العطش فيني
نبت بأرضي ثمر حبك
شجر تين وشجر ليمون



وصار الجمر في كفي
مواسم زهرها يكفي
ربيع وصيف
وريشة وسيف
وصار حبك بعد شفي
وكنت بنساك نهرف بي




نعم اهواك
نعم اهواك
نعم اهواك


واظن الحب مايكفي
لأنه عاجز ومسكين
لأنه ماتْصَلـه سكين
لواحد ماعرف هالحب إلا الحين
لواحد ماجرى دمّه في قلبه
لين هو شافك


وصرت النبض فعروقه
وصرت الأرض
وصرت الجو فعيونه
وصرت الضي
ياسدرة وفيْ

نعم مره
نعم ثنتين
نعم ألفين
نعم مليون


أحبك واكسر الحاجز
وادوس الخوفـ
وادّفي بردي العاجز
وأهديك رغم أنف الزمن قلبي
واحبك زود...!

{ تدور الأرض }


تدور الأرض
وتتغير وجوه الناس

تدور الأرض
ومايتغير الإحساس

تموت الناس
وتولد في ثواني ناس

ولكن
يازمان الياس / ياعمري
تدور الدنيا مهما تدور
ومايتغير الإحساس


يروح الصيف
ويلفي بعد منّه صيف

وانا ياحيف
واقف في ظلال الزيف

أشيل أحلامي الخرسى
واقول العمر ماينسى


متى بتنسى هموم الصيف؟


ياحلم الصحرا للأمطار
متى تتعانق الأنظار


لأني ياعطش روحي
أحب كل شي

أحب الناس
واحب الأرض
واحبك حب ماينقاس

ومهما تدور هذي الأرض
أبد ماتغير الإحساس .

{ أبي أرحـل }

أبي أرحل عن الدنيا
وانا ساكت

لأنه حزني ألغاني
وأشواقي بعد ماتت



لأنه مابقى فيني
سوى جرحي
شوي من الألمـ
مدفون في صرحي




أبي أرحل عن الدنيا


أودع ناس
وتبكي ناس

وذيك عيون بعض الناس
ماتبكي !




ألم بيني وبين نفسي
يقلّي :
عطني آمالك وخذ يأسي

وسوي من بقايا الحزن
في ليلك
قصايد تصبح وتمسي



وودعهم بعد هالناس
تراهم مايحبونك
ترى ماعاد يبغونك
لأنك تختلف عنهم

وتلبس ثوبك الأسود
مطرز بالحزن والخوف
لأنك تنظر لأبعد
من حدود النظر والشوف



واقول احسن

أودع ناس
وتبكي ناس

لأن عيون بعض الناس
ماتبكي !

{ ما أدري }


من الصـادق؟
من الكاذب؟
من اللي حب في الدنيا
بكل اخلاص

* ما أدري



من اللي يشتري خاطر
عيون الناسـ
وكل الناس ماتدري !؟



تحس إنه بشر عابر
بدون احساس


غريبه هذي الدنيا
وأغرب منها هالناس ..!

{ المدينه }

هذا آخر ماوصلنا له ؟

بعد ماكان كل الناس تحسدنا
على الود اللي حنا عايشينه

إنت
في دنيا بعيده !

وآنا
تايه وسط غابه
من مشاعر
تلهب القلبـ وتبيده
من وريده لاوريده


ورغم هذا عايشين
تحت سقف البيت
لكن
ضايعين بهالمدينه !!



آهـ ياظلم المدينه
وياقساوة قلبك
اللي عارفينه


كل خلق الله وقلبي
وانا قلبي فيك أعمى


كيف اشوف؟؟
وانا يلبسني العمى
حيره وخوف

كيف اشوف؟؟
والهوى قيدي
وسجان الظروف


وانت شوف
وين صرنا عايشين
تحت سقف البيت لكن
ضايعين بهالمدينه !!



العواصف اللي تجتاح السواحل
والمواني داخلي فعلا غريبه
هجّرت حتى النوارس


والسفن والناس ملت
ماتبي للحب حارس


ماتبي هالقيد يمكن
بس تحلم كل ليله


بألف فارس


ينتشلها من الضياع
ويفرد ضلوعه شراع
وينحني لريح المدينه

آهـ ياظلم المدينه
اللي فيها عايشين
تحت سقف البيت


لكن


ضايعين بلا مدينه !

{ ماااااااات }!!



إيه مات
قبل يكمل عامه الثامن
بليله
في حضن أمه
ومات
قلب أمه في سكات
وهي تشيله
كان حيْ .. وهي قتيله ..!!




وكان آخر اعتراف
قبل موتـه بدون خوف
وكان صوته
يصرخ ويملي سكوته
بس لامه يعترف


قبل موته
كل واحد فينا وده يعترف
بس لامه يعترف

وصاح يمه
آهـ يمه
آهـ يمه
ليه حلمي ينذبح؟

آه يمه .... قالها
وانبح صوته



وماتمالك عبرته
سافرت به عبرت الموت
اعبرت به
ألف عالم
ولـ الف واقع ودته



ويوم قرر يستريح
مالقى في الكون كله

{ غير أمه }

ينهي معها رحلته
وماتوقف نزف دمه
وماشعر بإنسان يَمّه
{ غير أمه }


وصاح بأعلى صوت يمه

ماأبي تبكين يمه
ما أبي تبكين يمه


خلي الدمعه تغطرف
والحمام اللي تعوّد
يحبس أحلامه
يريرف فوق قبري
لاني أول من يموت
ولاني آخر من يموت
بعمر بدري

ودي أفهم
بس أفهم
ليييييييه يمه ؟
لييييه يمه اذبحوني بدم بارد ؟؟!

ايه يمه افتكرت!

اذبحوني
لأني شايل في يدي اليمنى حصاه
يارخص هذي الحياهـ !

عطريني
لو نويتي تودعيني
واغسليني بالحنان
اللي أبيه وريحيني
والله بفقد هالأمان
وروحك اللي حببتني
في المكان وضي عيني

انتي يمه ضي عيني
ودعيني واقري
{ يس وتبارك }
يمكن القبر يتبارك



واكرميني بالدعا
وارفعي الكفين للي
مايخيب من دعا


واطلبي لي الرحمه يمه
واجر من طاف وسعى


طالبك بالله يمه
طالبك بالله يمه
طالبك بالله يمه



لايتوقف بعد موتي هالدعا

واسمحي لي
قبل يغمض جفن عيني
وتتركيني !!

أعترف لك


إني أحلم تحمليني
تسعة اشهر من جديد
والله ماهو حب يمه للحياه
ولا أبيها
ولاني منها مستفيد


لكن إنتي فيها يمه
وحب ساري في عروقي للبلد


والا هاذي دنيا يمه !!!؟


والله دنيا مثل هذي
ماتشرفني أبد

دنيا دود الأرض أرحم
من أهلها للجسد

ما أبيها

بس أبي حضنك وأدفا

وانولد بإيدي حصاه
ويذبحوني من جديد
أنا ميت في نظرهم

صح يمه
بس حي !

وكل يوم يموت واحد
ينولد مليووووووون واحد
ينتظر يصبح شهيد

{ زهرة توت }



ماقدر صمت المكان يحتملنا
وماله معنى السـكوت


وكان هذا بحد ذاته
صوت عالي ..
يرفض الكلمه تموت

ياكلامي لاتموت
مثل زهرة .. ويل زهرة
ويل زهرة معلّقة
في غصن توت


آنا .. وانت
ولحظة الصمت الرهيبه
وخوف عالق بالعيون

ورعشة تسكنّا غريبه
مادرينا من تكون


وليه جتنا وفرقتنا
وقبل مانفكر نقول
ليه جتنا ؟!

الحين يعني
ودها الحاله تطول ؟



كل واحد فينا ودّه
مايضيع أيْ لحظه
إجمعته بشخص حبه
أو يوده


لكن الخوف اللي علمنا السكوت
مارحمنا ... هو ظلمنا
واحنا مثله
ماتعودنا نردّه لو نموت



هذا هو سر الهدوء اللي ذبح فينا الكلام
مايلام اللي يخاف من الكلام

ياكلامي لاتموت
مثل زهرة .. ويل زهرة
ويل زهرة معلّقة
في غصن توت

{ أحيان }

أحيان يعجبني الزعل
واحيان مااريده !

واحيان ياخلي الزعل
أطلبك انا تزيده

مدري وش اللي أبيه !!


ضايع مابين أمرين
الحلو فيهم ألم
والمُر تدري به .



حالة غريبة عشتها لحالي
مابين شوقي وبين غربالي
طاري رضاك الهاجس الغالي


أما زعلك
الله لايجيبه .




مرات اخاف واكتم أشواقي
ومرات أجازف واكشف أوراقي



حيرة غريبة طعمها راقي
مابي الزعل فيها وراضي به !!



مدري وش اللي أبيه
ضايع مابين أمرين
الحلو فيهم ألم
والمُر تدري به !



أحيان يعجبني الزعل
واحيان ..... ما اريده .!

{ أعاني }



الغريب إني أعاني
مثل كل الناس اعاني


مثل كل اللي هواهم
في الهوى
راح ونساهم
أو تناسى
ماعرف قلبي الوناسه



كيف مثلي اليوم يهدى
وخطوته هم وتعاسه !؟


كيف مثلي يصير عاشق
والزمن شارد بناسه


هو تركني
وماتركته

هو فضحني
ومافضحته


هو تجنى وصار خصمي
داسني بقسوة وشراسه



وزاد نبض الشوق فيني
واكتشفت إني أبيه

و

للأسف هو مايبيني !!

{ أمّــــــــــــك }


حط راسك فوق صدري
واحكِ لي عن كل حاجه

ماقدرت تبوح فيها لأي واحد
غير قلبي اللي احتظنك

وكنت له
في أغلب الأحيان
جاحد !!

بس لا آنا ولا قلبي
قدرنا نلغي من دنيانا
حبك أو غلاك
لنّك الخفقه بقلبي
ولنّك سراجي وهواي !


ومامعاي اليوم
في حبك شريك

ياضناي
ياحشاشة جوفي
وبلسم زماني


ياضناي
حط راسك فوق صدري

آنا أمك

آنا من آمن بضعفك
لحظة إحساسك بظلمك

آنا أمك
قلّي من يقدر يخفف
غربتك عنك
وهمّك ؟!
غير أمك


آنا امك !
حط راسك فوق صدري
واحكِ لي عن كل حاجه .

{ كذبه إسـمـها الميـنـا }


غربة تسأل
وين هو المينا ؟

سمعنا عنه ماشفناه
وينه ؟!

قالوا إنه موطن اللي آمنوا بالحب
واحتلّوا جبينه

وآنا منهم
لكن الحظ وزماني

عاندوني
ضيعوني

وابعدوني عن يدينه
ومالقيته !


مينا ضايع من عيوني

وين بيته ؟
وين هالمينا فديته ؟

يلتفت يمّي شوي
حن يالمينا علي

وماعلي إلا أشرّع باب عمري
واحتفي بك

لو بغيت تحن ياروحي علي
هات ايدك !

الطيور اللي تهاجر
والسفن والناس في حضنك
أمانه
مش عبيدك

هات إيدك
مدها تكفى وخفف
نار منهو مستجير
ببرد قربك من هجيرك

آه منك
آه يالمينا
ومنك كل شي يبدأ أكيد


العمر واحلى الليالي
واروع ابيات القصيد

إنت يالمينا محيّر
مثل هالدنيا متغيّر
في ظروفك

وآنا غربه
ذااايبه
في حب غربه !

من عرفتك
ومن عرفت شلون أطير
وحتى
عافتني كفوفك !

بالنـظــر

بالنظر
بس التقينا بالنظر

لاني قدرت امشي
وهي مثلي

بس تطالعني
واطالعها بحذر

تبغى تقول وتستحي
فعيونها حزن وخجل

لمة هدبها
وابحرت في داخلي

حلفتها يابنت
لا
لاترحلي


إنتِ وانا نفس الحزن فعيوننا
يجمعنا بالصدفه الطريق
وماندري باكر
نلتقي
والا يفرقنا الطريق!!؟



مثل الطيور لــ ْمهاجره
وقت الشتا
مايردها صيف العمر
لكن تجمعها متى ؟



ردت وقالت :
بس ذا كله كلام
وش ينفعك ؟
وآنا بعد مااقدر اطول بالكلام

ودك تعلق بالسراب
ما أمنعك !

لكن ترى ياابن الحلال
بودعك !

{ لا تـسـافــر }


لاتسافر

قلتها وبقلب صابر
قلتها لأني مهدد
وانتظر بعدك مشاكل



أنتظرك بخوف قلبي
ورعشه تسكن بالكفوف

انتظرك وماي عيني
لمعها مثل السيوف


وآتحرق
وآتشوق
واتحرى جيتك
رغم الظروف


ياغناتي
ياهواي وصافي الود بحياتي
ياطفل مولود ساكت


لو تغيب
أعلن مماتي!




أعرف إن العاطفه
كانت سلاحي

والعواطف في زمنّا
للأسف أضعف سلاح



أعرف ان العاصفه
إنت وجراحي
والعواصف والسفر
عمق الجراح



لاتسافر
لاتسافر
لاتسافر

مااظن بعدك
بتشرق زهرة ٍ
تعبد صباح


أنا ماودي تسافر
لأن

طاري السفر
سمي
لأنه يالغضي
همي



وصرت أتنفسه حسرات
وصرت أخاف من بعدك
من أول مره كلمتك
عرفت إني أبيع النور
واهدي لخافقي آهات



وهذا ماكفى قلبي
ولكن ضمّك بلهفه
وسوّى خطوتك بسمات



وإنت اليوم
أو باكر

تبي تسافر!!

تبي تخلي الفرح فيني
جريح ويكسر الخاطر


أنا ماودي تسافر


السفر خلّى المشاعر
تنتطق بحلو الكتابه

والسؤال الصعب دايم
تنتحر فيه الاجابه

اسألك بالله
ياللي تمنح لقلبي عذابه

لاتسافر




السفر
ضيم المودع

السفر
هم المودع

السفر
طعم الكآبه

السفر
خطوة مفارق
ضيعت درب بشبابه


والسفر
ياروح روحي
واقف ٍ حظي ببابه

واعرف ان الحظ ضدي
حتى لو صادفني مره
ينقلب مرات ضدي

وش بلاه بجور يحكم
ياخذك لو كنت عندي
اطلبك ياحظ مره
خلني أبقى معاه

ماأبي مره يفكر
في السفر لو هو حياه
والسفر ماهو حياه


السفر موت وتجني
ينكتب فوق الجباه

السفر هو ظل عاشق
مات في نشوة صباه

وانا عاشق لْـ خطاوي
قلبه وعينه عصاه

وماأظن االدنيا تحلى
إلا لو إنك معاه




لاتسافر

مابعد تشبع عيوني
مابعد أروي ضماي
مابعد يرتاح خاطر
يسكن بعالي سماي


لاتسافر


السفر
ماهو ضروري

السفر
يلغي شعوري

السفر
خلاك تبعد
حتى في لحظة حضوري


ماأبي يازين تبعد
أو تغيب
ماأبيك تروح عني
كون ياعمري قريب



كون جنبي
كون حلمي
كون حربي
كون سلمي
كون كل العالم
المصلوب
في شباك همسي



لاتسافر


ماأبيك ضيوم صيف
وماأبيك تكون ضيف

ودي ياعمري أعيشك
لاتقول الحين كيف!!؟

ترجم الاحساس صرّح
قبل ماتنوي تروح
لاتخليني معلق بالهوى
ثمن تروح!!




من عرفتك والاغاني
تعزف الحزن وتنوح

من عرفتك
كل همي هو خيالك

والخيال
أصبح طموح



ورغم هذا
ورغم عني
أطلبك مابي تروح


ولاتسافر

حتى لو أصبح خيالك
بس هو كل الطموح



لاتسافر

لاتسافر

لاتسافر

{ مـانـي حـجـر }

خلني معك ابتدي
اول خطاوي رحلتي
واشعر مثل باقي البشر
إني بشر ..



لي قلب يحلم ينتظر
لحظة لقا ..
وانا بعد مثله
أبي أدفا بلقا


ماني حديد
ولاحجر ..!!



ودي تفكر تقترب
وانا بشعوري أقترب
والقاك مره واستريح




بس اقترب ودي أعيش
لحظة لقاك

أو

تلتفت يمي برضا
لو من بعيد



تدري شيصير لو تلفت؟



مافيه طير بهالسما
يرضى بضما في رحلته

أو

يشعر إنه مغترب



بس اقترب

وانا أخلي هـ اللقا

غيمة لقا
وديرة شعر
مامرت بخاطر احد

إلا لقا
من يلهمه فيها
أكيد ويفهمه
واكثر بعد
من أي شي تتصوره!!



ديرة هوى
ذابت صدق

من عشقها لك
ودها ليله تمر
واحلام قلبي مثلها
في الانتظار
ذبلت
وباقي تنتظر


إنك تجي

أو

تعطي قلبك فرصه
مره يحبني



وبعدها مابي الحياه
بحلوها .. وبمرها
ماتهمني
إنت الأهم !

وقلبك اللي همني
طال العمر .. ولا قصر
مايهمني


مدام قلبك حبني !!
مايهمني !

{ الغـربـه }



تعلمني
سنين الغربه واتعلّم

تعلمني
أعيش الصمت ولا اتكلم
ولا حتى
أبوح بسري واتألم

حزين وصوتي شراعي
غريب وغربتي الداعي

خذتني الغربه وياها إلى الغربه
ووقتني ظامني واعلن علي حربه

ألا ياشين هالغربه
تعلمني !!


أغرب شعور
إنك تحس إنك غريب
والناس من حولك حضور



أغرب شعور
الغربه صارت لي وطن !


مدري أنا وش هالشعور
مااخترت انا هذا الحزن
ومااخترت انا هذي الأمور


خذتني الغربه وياها إلى الغربه
ووقتني ظامني واعلن علي حربه

ألا ياشين هالغربه

تعلمني !!



نعم صعب الزمن لو فات
بس الغربه الأصعب !


نعم متعب من الآهات
واعرف إن البشر تتعب



نظر لي واقعي مرات
وعيني تحسبه معجب



ألا ياواقع الحاله
ترى عودي نشف حاله



ويشكي هالهموم لمن؟
حزين وحايرٍ باله

وحزنه خيّم بجاله
مساره غربته والظن


خذتني الغربه وياها إلى الغربه
ووقتني ظامني واعلن علي حربه

ألا ياشين هالغربه

تعلمني !!

{ ذنـب المـعـرفـه }

غرد الحرف وتكوّن
كل غيم العشق
في كلمة { أحبك }

فوق صفحة من ورق
فوق صفحة من أرق

عودته الشوق يعزف
لحن حب

للسما
للطير
للنجمات
وخيوط الشفق


وانسكب هالحلم نرجس
قام يهمس ذاب صوته
وانجلت روعة سكوته


يوم غنى للورق

غنْ ياذا القلب غَـنْ
وانثر الشعر وتغنى
لطيبة اهل الريف ونخيل العواطف

للسواقي
للسما الزرقا
وللفرقا على ظهر السفن

للمدن
للقلوب اللي نهشها الإنتظار
وهدّها جور الحزن !



للسواحل غنْ تكفى
يمكن ان الجرح يغفى
ويمكن القسوة تحن !
والعواطف تستجن
وفيك تهدى هالمشاعر
من تعبها ويحتفل بك هالحضن


بس غنْ ولا يهمك
واسرج دموع اليتامى بالتفاؤول
عطّر المنديل ضحك
واحكِ للريح الجروح
ومن يهمك

دام روحك في ظلال الحب
غرّد واستجن



بس غنْ
وهاك لحن الحب مني
عيش فني
ذوق ذنب المعرفه
يوم جرب واعزفه

لاتحبه ... إنصفه !!



ماتحسه في شرايينك
يتمتم منسجم ؟!
مدامه نوى يسمر بدافي هواك
وحسك المترف نجم !



ماتحس ؟
والا ماودك تحس إني بروحك
آنا فيها غصب عنّك
جات منك
وارجعت لك
أمر قلبي منحسم !!

{ وين النـور }


جيت اشتكي للنور
للريح للعصفور

لضلال بيت منحني
وجناح قلب من التعب
مكسور !

من ينصر الدمع اللي واقف
في مهب الذكريات
وشالها المسحور ؟


وين النور ؟!!

مازارها الضحكة فرح
أو مر يوم من الفرح
بالقاع حسه ضاع


ماشافني بعينه حلم
ينزف ألم مهجور ؟!


لا بالكلام وزيف هالدنيا أعيش
ولاكتبت وماحسبت لأي شي في الكون

غير انّي أكون شاعر وبس
ماقد لبس في دنيته غير الشعور


هذا أنا
وين انت ياكذبة زمن ؟
وين إنت ياذا النور ؟!!

{ أذكـــــــر }

أذكر ان فيروز أتعبتنا
يوم غنت

{ حبيتك تنسيت النوم ياخوفي تنساني }

واذكر بعد إني التفت وقلت لك :
هالبيت بكاني !

رددت انا معها وقلت " { معقول تنساني } !?

ناظرتني واهديتني وردة وسِكَـتْ
وانا عرفت إنك تبي تعرف
إلى وين الفكر ياروحي ودّاني

تدري لـ وين ؟
وداني لك


واذكر حبيبي قلت لك : { خوفي تروح }
وقلت لي : وش له تخاف ؟

من يومها وآنا اخاف حتى رجعت !

واذكر إني جيت مرّه
قبل موعدنا بساعه
وانتظرت


وكان عقرب هالثواني
يلدغ الوقت وذبحني
وماحضرت !


وصرت أحلم
وصرت اكلم في سكوتي ساعتي
وكل من مَرْ ولمحني صار يرثي حالتي

حتى من نفسي خجلت !



شلت حلم الوعد من عيني
وقمت من مكاني

وكان خوفي
إن فيه مكروه صابك
أو ألم سبب غيابك

واحترقت !




وزاد خوفي يوم دارت في خيالي
فكرة قالت : إن قلبك من مفكرته لغاني
وان فيه انسان ثاني في حياتك وانكسرت !


ورحت بيتي في هدوء
ويوم ثاني بكل برود
جيت إنت ... واتصلت

قلت : آسف مانسيتك
غافلتني عيني أمس
ماعطيتك فرصة نتلاقى
حبيبي ماني داري كيف نمت

قلت : إنس لاتقلي كيف نمت

وافتكرت !

{ لـيــــه ؟ }




ليه حزن الأرض كلّه
مايساوي وسط قلبي


وزن ذره من تراب
ليه هذا الإغتراب ؟

وليه حزني صار سيرة
ينحكي في كل ديرة

وينكتب بعيون عالم
ماعْرفوا معنى العذاب
مااعرفوني !!


حسسوني وانا معهم
إني والله ماني معهم


جيت ليه ؟
وليه حظي من رداته
بي جمعهم
وانخلقت !

للحزن اللي سكني
للنفاق وللمصالح

في زمن أعمى
طعني وآنا اشوف .




وين بلقى أجوبه
في زمان الصدق
ميّت دوم فيه



والإخوة
زيف دنيا كاذبه

ماتشوف ؟؟




وماسألتو ليه أسأل!!!
والحقيقه
غايبه عن عيون الناس والله
والأماني في زمنهم خايبه


خايبه والله وزمنهم مايبيني
وآنا مثله ما أبيه
ونفسي منه طايبه !




دنيا ماترحم أهلها
ما أبيها
العذاب اهون وأسلم
حتى لو بأرضه ذبلت




ماسألت !
وليه أسأل يالعذاب؟
وانت أطيب من أهلها لو بخلت !!!


والله مافي داعي أسأل يالعذاب

{ وين ماخذني أبد }؟



ليه أسأل ؟
دام كل العمر
ماهو في ايديني
ولو بديت الرحله
مدري تنتهي بأية بلد




هذا هو حال الجسد
ينتهي بأية بلد ؟؟؟



أوقف بوجه العواصف
لاتهدك هالظروف
وتنحني ويشيخ صبرك



ياولد قوم يالله
وهات حزنك وانثره
فوق جيد الصبح يالله بعثره
لاتخاف من المشاعر ياولد

موت في حب البلد
واللي ساكن هالبلد



وان ملكت الناي
إعزف
للطيور
وماتبقى من شعور
ضايع بأية جسد !



يالله اعزف
لايتوقف لحن حزنك


لاتخاف
مو ضروري يسمعونك
دامهم مايعرفونك


غرد لنفسك واعزف
لحن حبك للبلد



يكفي نبضك في سماها
وفي حضنها الدافي قلبك


ليه خايف ياولد؟

لاتخاف
لاتخاف
لاتخاف

{ الإنـتـظــار }




عمري ماحبيت كلمة إنتظار
إلا يوم إني عرفتك
عشت معنى الإنتظار

ذبت فيه وذاب فيني
وصرنا واحد
نعشقك ليل ونهار


بعدها طبعاً دريت
ليه جيت ..؟
وليه قلبي بكل بساطه
كان واقف فـ انتظارك

يحتري بردك ونارك
يحتريك
وانت مافكرت
لحظة تحتريه !!؟

قول وارحم
من سقاه الوقت مُرّه
ألف مَرّه
بعد مره فـ انتظارك
ماتجيه!؟


ليه مافكرت فيه؟
تدري ليه؟

لنّك أقسى من الصحارى
من حجر صوّان
ماترويه غيمة عابرة
والصحارى ماترجى كل غيمة
وكل غيمة ماهي غيمة ماطرة

الأراضي البور فيني صابرة
عاشقة دايم تبيني

من أصابع رجلي أزرع
حسرتي حتى جبيني

وماتبيني أحلم
بإحساس صادق
بعد عشر سنين غربه يحتويني !


ماتبيني أنتظرك؟
إنت ماتعرفني زين
أنا كل صدمة وصدمه
بينها صدمة مشاعر
من عرفت شلون أحكي
حتى صار الحزن ديواني الأخير


وصرت شاعر
بس فيك

وبعد وعدك
مت فيك

وفـ انتظارك

{ ذكريــــــات }

أول الحزن
دمعه

وآخر الحزن
دمعه



وبين دمعه ودمعه
مجتمع حزن دنيا داخلي
صعب جمعه !



بيني وبينك ذكريات
ماعمرها مره غفت
في خاطري ولا استراح
من تعبها أو بكت إلها عليك


متعلقه بحلم ووهم
واشواق طالبها السهر
في الانتظار اللي كبر مثل القهر
في داخلي /

من يوم ذاقتني يديك
شَرقت يدي
حسيت بالروح ارجعت فيني

مادام قرر هالهوى
ياخذني له

ليه اسأله
تاخذني ليه ؟

مادام حب إني أكون
سيّد مجانينه
وأعقلهم جنون

ببدا الهوى
من لمسة يدينك أنا
واتذكرك مهما يكون

مجنون فيك
وفالهوى
والموقف اللي فيه شفتك والمكان

وعيون تحرص هالشعور
اللي سرى بعروقنا
وفينا قرى
مليون بيت من الشعر
للي درى أو مادرى

كيف الشعور يتحول بلحظة بشر ؟!
يتحرك وعطره يذوب فـ كل شي
حتى بدمي

{ إحساس عادي }
نادر إنه ينوجد في آدمي !!!




بالمختصر
بالمختصر

أتذكره والغي قوانين اللي ماحبوا أبد
أو عاشوا مره تجربه


بتذكره
حتى ولو باب النجاة
مقفول في وجه الأمل

مابسأله ليه انقتل
وليه انقفل
مادامني بتذكره!



في معركة ذكراه
والله لااحتفل
بالموت فيه
واللي يبيه
واللي أبيه
إني أموت حسره عليه
هذا اللي حسيته أنا

يوم اني جيته
بارد أطرافي وجل
متلعثمة من خوفها
مو قادره تسلم عليه



والله قلبي ماسألني ليه أبيه ؟
علّقت قلبي في ايديه

من قبل ماافكر أنا
هو مات فيه

وضعت أنا
في الحالتين



والله مدري
قلبي باقي في مكانه؟
ولا غادر ذا المكان !؟


هذا قلبي
وآنا ادرى فيه وادرى

حب توّه
وشب ضوّه
في زمان العاشقين


يازمان العاشقين
جيت حب
وجيت ذكرى من أحب !


وكان بيدي ورد
للي خلاني أصدق
إن فيه إنسان يولد مرتين !!

بدر الحافي

الشكر لك لـ مرورك الجميل
سعيدة بأنني قدّمت لك
ماكنت تبحث عنه !

الهنوف

كَيان

من tsh3
أشكرك على حضورك الجميل ..

لروحك tsh6

أنثى الضجيج

بحضوركـ زدتِ المكان جمالاً
شكراً لكِ من tsh3