|
المشاركه مطلوبه وللاعتذار عقوبه!!
اول شي الله يحييكم وماقصرتم بالزياره ثاني شي الله لايهينكم كلبووكم تشاركون وطبعا كالعاده غصب<<<ماعندها شي بالطيب :mad: والفكره كالاتي كل واحد يدخل ويجاوب هالاسئله بمنتهى الذوق والذرابه التي لاتخلو من الروح المرحه والطرافه. :white: ...اعزائي المشاهدين اليكم الاسئله وتفضلو علينا بالاجابه<<<مصدقه عمرها :rolleyes: س1 الأسم في المنتدى الكنيه (واذاتبي تعطينا اسمك الأول ياليت)؟ س2 العمرالحقيقي ؟ س3 اللقب المفضل لديك خارج المنتدى ؟ س4 المؤهل الدراسي ( اختياري)؟ س5 الوظيفه (اختياري)؟ س6 الهوايه المفضله ؟ س7 برنامجك اليومي؟ س8 عطرك المفضل ؟ س9 افضل بيت شعر سمعته ؟ س10 اطرف موقف مر بك ؟ س11 اصعب موقف (اختياري)؟ وسلامتكم وترى الموضوع ملطوش نص لطشه :rolleyes: |
رد : المشاركه مطلوبه وللاعتذار عقوبه!!
بما انه موضوعي انا اول من يشارك عاد كيفي حررررررررررره :white: س1 الأسم في المنتدى الكنيه (واذاتبي تعطينا اسمك الأول ياليت)؟ العنود س2 العمرالحقيقي ؟ العمر كله انشالله لي< اذا فيه خير> س3 اللقب المفضل لديك خارج المنتدى ؟ عنووووووده س4 المؤهل الدراسي ( اختياري)؟ بكالوريوس للغه انجليزيه س5 الوظيفه (اختياري)؟ والله عاطله باطله حتى اشعار اخر س6 الهوايه المفضله ؟ القرائه والنت س7 برنامجك اليومي؟ قبل برنامجي اكل ونوم واجبات اجتماعيه وناسه وهالحين عقب راحت الشغاله كله شغل<<عاد بدا التسذب :rolleyes: س8 عطرك المفضل ؟ كل عطر جديد ينزل اشتريه اذا عجبني وما اكرره الا مرتين بس اذا عجبني مررره س9 افضل بيت شعر سمعته ؟ ماترتضي نفسي بمذله وحقران..بردها عمن سعالي بذلي نفسي عزيزه ساميه فوق يافلان..ابعد من نجوم الثريا محلي س10 اطرف موقف مر بك ؟ المواقف كثيره الطريفه ..بس اذكر منها موقف صارلاخوي اللي اصغر مني على طول كنت رايحه معه للسوق وجينا ندخل محل كل واجهته قزاز وكنا نتناقش بكل حضاره<قصدها نتهاوش عشانه قرفان ويكره السوقه> المهم عاد الرجال معصب ويمشي وراي وانا ادخل بسرعه واخر علمي فيه اسمع صوت ضربه قويه يمكن ماعمري سمعت مثلها يوم لفيت بسرعه والقى اخوي لازق بواجهة المحل القزاز وهويعدتدل واشوي وهو يدور بغى يغمى عليه انا يوم شفته مت ضحك وهو ياحرام ميت من الفشله حتى العمال كسر خاطرهم لان الضربه قويه وانا ميته ضحك لا بعد الاخ لابس نظاره وانا من النجاسه قلتله احسن جزاك يوم تهاوشني بس غريبه مارد علي اثر اخوي دايخ ياحرام س11 اصعب موقف (اختياري)؟ اصعب موقف مر علي بحياتي ..كان في يوم عندنا بنات خالي ودخلن المطبخ هن وخواتي والشغاله يعني بربطة المعلم كلهم من زود السنع بيسوون حلى وفطاير ويكشخن علينا ذاك اليوم وبما اني من اشد الكارهين للمطبخ مادخلت معهن وكنت قاعده اتابع التلفزيون بالصاله اللي تحت وحتى اخواني وامي ماكانو فيه ..بس انا المقروده المهم فجئه وانا اسمع صوت شي انفجر ودريت انه بالمطبخ طبعا مت من الرعب والخوف واسمع صياح وصريخ قوي ماقدرت اتحرك من الخرعه وحسيت بذيك اللحظه بكل انواع الفزع والخوف والحزن في لحظات تخيلتني فاقده خواتي وبنات خالي والحيه منهن متشوه قعدت اصيح اشد منهن ورجولي حسيتها جامده ماتشيلني وكنت اناظر الجهه اللي فيها المطبخ وانا فاقده الامل بالماضي والحاضر والمستقبل لعايلتي وفجئه شفتهن كلهن طالعات يركضن مافيهن الاالعافيه.. وبعد يضحكن انا كنت كاني احلم كنت اقول لنفسي اكيد اني اتخيل مستحيل احد يحيا عقب هالصوت بس سبحان الله رحمة الله اكبر من كل شي وطلعن كلهن والشغاله مافيهن شي ابد قعدت اصيح من شدة الخوف والفرح بنفس الوقت شعور مستحيل اوصفه ولا اتمناه لاي احد بالدنيا... >>>اكيد تبون تعرفون وش صار بالمطبخ :) اللي صار بببساطه ان البنات فتحو نار الفرن وصكو بابه بقوه وطفت النار وقعد الغاز يتجمع فيه وجت وحده منهن تبي تفتح عليه من فوق فا اول ماولعت النار قبعت وسبحان الله كان اختي جايه بالجنب وهي تولعه فا فتح باب الفرن من نفسه وعقب صك بقدرة قادر لدرجة انه تحرك من مكانه وبعدين هجن بالسلامه ولاجاهن شي اللهم اللي كانت جنبه احترق طرف لبسها لا وطلعت وحده منهن بطله وسكرت اسطوانة الغاز ووبس <<<لاعمركم تخلونها تقول قصه :white: |
رد : المشاركه مطلوبه وللاعتذار عقوبه!!
إقتباس:
2\ 25 3\ :rolleyes: 4\ tsh9 طالب القرب 5\ tsh2 6\ السباحه في الهواء والتزلج ع الجليد 7\ من البيت للمسجد للمسجد للبيت 8\ هابي كلينك , ستلا :rolleyes: , فينت , بيور .. 9\ كثير .. بس اذكر الان (( حزني عليك اكبر من دموع عيني ** هذا السبب لا قلت لك ليش ما ابكيك )) 10\ :rolleyes: 11\ :mad: وبس خلاص شكرا عنود الصيد .. |
رد : المشاركه مطلوبه وللاعتذار عقوبه!!
موضوع جميل وفيه اقتحام لخصوصيات الاعضاء << جاوب ولايكثر :white:
س1 الأسم في المنتدى الكنيه (واذاتبي تعطينا اسمك الأول ياليت)؟ الاسم خالد س2 العمرالحقيقي ؟ بالسنين قليل وبالي شوفتوه كتير << معليش على البثاره بس ابي اقهر محمد وحسن العمري :white: س3 اللقب المفضل لديك خارج المنتدى ؟ فتى الادغال :white: << ماوكلي :white: س4 المؤهل الدراسي ( اختياري)؟ جامعي تخصص علمي دامه اختياري منيب معلم :) س5 الوظيفه (اختياري)؟ حاليا اعمال حرة س6 الهوايه المفضله ؟ الشعر والرياضه بشكل عام س7 برنامجك اليومي؟ في الغالب يكون جدولي من العصر الى بعد العشى بساعه مقيد بنظام معين وبعدها فوضى ماعمري مشيت على جدول معين على طول الايام والعلاقات الاجتماعيه تلعب دور في هذا التغيير المستمر :white: بس الحمد الله ماشين ونمارس الرياضه وكل شي زين والحلال يشبع وسهيل طلع مدري وين راح وبخير وستين نعمه :white: س8 عطرك المفضل ؟ دهن العود والعود الازرق << طراه المقناص :white: بصراحه ما اتقيد با اسم معين الي يعجبني اخذه بس فيه عطر جاني هديه اسمه الظاهر لورد من كثر ماهو معجبني معاد اتعطربه اخاف يخلص :white: س9 افضل بيت شعر سمعته ؟ بصراحه احفظ ابيات كثيرة معجبتني بس فيه بيت مدري من قايله معجبني مرة وهو من لا يعدك ربح عدّة خساره ...................................... ... ومن لا يشوفك شي عدّة ولا شي س10 اطرف موقف مر بك ؟ المواقف كثيرة وبصراحه انا ماحب اطول في الكتابه بس كان لاياقتي ساعدتني رجعت وكتبت موقف صار لي من شوي :white: س11 اصعب موقف (اختياري)؟ فيه موقف مازال له اثر كبير في نفسي ماقدر اقوله وغيرها كثير بس يمكن اخرها توديع احد اعز اصدقائي في المطار لسفره لتكملة الدراسه برى :( يعطيك العافيه ياعنود ودمتي بخير وشكرا على هالموضوع الجميل تقديري واحترامي |
رد : المشاركه مطلوبه وللاعتذار عقوبه!!
س1 الأسم في المنتدى الكنيه (واذاتبي تعطينا اسمك الأول ياليت)؟
امممممممممممممممممم ( دانه ) س2 العمرالحقيقي ؟ نغرف في بحر العشرينات ... س3 اللقب المفضل لديك خارج المنتدى ؟ وحش ., غيم .. س4 المؤهل الدراسي ( اختياري)؟ دبلوم عالي حاسب آلي س5 الوظيفه (اختياري)؟ إدرايه بمدرسه حكوميه ... س6 الهوايه المفضله ؟ القراء , كتابة الشعر , الخواطر, قصة قصيره,الرسم , التصميم ,السفر, السباحه :white: , الرقص :white: واجد هواياتي :( س7 برنامجك اليومي؟ وبما ان الدوام العلمه بدأ ..فأنا نوم دوام تلفزيون ..فيديو .. س8 عطرك المفضل ؟ جميع مجموعة عطور ( كرستيان ديور )................. س9 افضل بيت شعر سمعته ؟ لثامر الشعيفان ومازال عالق في ذهني مــا همني لو ضاق كوني ومافيه ................................... المـــوت لامن ضــاق بي صدر غالي س10 اطرف موقف مر بك ؟ كثيييييييييييير المواقف المضحكه :white: بس مافي بالي شي الأن لأن جايني النون tsh2 س11 اصعب موقف (اختياري)؟ وفاة عمي ...... :( عنوده شكراً ياقلبي ................ :) |
رد : المشاركه مطلوبه وللاعتذار عقوبه!!
س1 الأسم في المنتدى الكنيه (واذاتبي تعطينا اسمك الأول ياليت)؟ اسمـــي جـــــــود س2 العمرالحقيقي ؟ عشرين وعدد فردي س3 اللقب المفضل لديك خارج المنتدى ؟ ماعندي..بس ينادوني باسمي :rolleyes: س4 المؤهل الدراسي ( اختياري)؟ طالبه\جامعيـــه\physiothearpy س5 الوظيفه (اختياري)؟ توني ادرس :) .. على يدك عنود س6 الهوايه المفضله ؟ قراءه الشعر..متابعه تي في.. .. والرقصhttp://www.nbthat.com/vb/image.php?u...ine=1123452871..... والشوبنق....وش بعد...!!!! :D س7 برنامجك اليومي؟ بعد الفطور الي هو العصر..ادورلي مكان اروح له واذا رجعت نت و......... tsh2 س8 عطرك المفضل ؟ افضّل دهن العود والعطورات ماتقيد بماركه معينه.. الي تعجبني اخذها س9 افضل بيت شعر سمعته ؟ كثير بس تعــــبت امني الاسئله بالاجابه...........وانطر شروق الشمس والشمس بغـــــياب س10 اطرف موقف مر بك ؟ ياكثررررررررها والي يحرج اكثر .. اني ماعرف امسك ضحكتي tsh4 س11 اصعب موقف (اختياري)؟ :( عــــنوده شكرا على هيك مشاركه[ http://y1y1.com/hd5/albums/500/blue.gif |
رد : المشاركه مطلوبه وللاعتذار عقوبه!!
عنوده فكره حلوه .. ;) .. مشكوره ياعسل بصراحه أول ماقريت موضوعك خفت ..<< قالت وراها عنوده تبغانا نفضح بأنفسنا عاد يوم قريت ردودكم تحمست ... :55: ج1 _ نجـود ج2 _ عمر تكون شخصية الانثى فيه مقنعه , وقليلة الأكتراث ..<< غثيتي العالم بعلم النفس.. :white: ج3 _ والله اللقب المفضل أي شي بس يحسسني انهم رضيانين علي بقوه...بس اللي مره احس قلبي يرفرف لين سمعته هو لقب ياطربتي... tsh4 ج3 _ طالبه .. سبحان الله ذا السؤال اموت فيه .. :o ..<< تحاول انوه ماتنصب بس ولو الطبع غلاب ج4 _ الوظيفه انجز بعض الاعمال لابوي بالنت ..<< مرتفعه معنوياتها ج5 _ التمرجح على المرجيحه بالحوش و القراءه ومب اي قراءه فقط قراءة الروايات ..<< الا روايه شفيرة دافنشي حاسه انها كمخه وهي تقراها ج6_ برنامجي اليومي مدري على حسب الطلب اذا لقيت عالم عندهم سوالف تحمس جلست معاهم او طلعنا واذا مافيه حبست روحي بغرفتي اما انوم او اجلس على النت او ارتب باغراضي ج 7 _ والله العطور مدري احب اخلط عطور فرنسيه مع عربيه واحب التغيير مااستمر على نوع معين . ج8 _ بيت شعر والله حاليا اي شي يقراه تركي اليوسف بصوته أحبه وفيه بيت شعر دايمن عمي يقوله بس ماكنت حافظته لاخاب ظنك بالرفيق الموالي........ مالك مشاريه على باقي الناس ياعل قصر مايجيله طلالي ....... ينهد من عالي مبانيه للساس ( وشكر خاص للي ساعدني وكتبه لي .. :white: ج9_ والله المواقف الطريفه كثيره مابراسي شي حالياً ج 10 _ تقريبا وفاة شخص عزيز هو اصعب موقف لكن انا زواج أختي وسفرها مع زوجها.. سبب لي فراغ كبير كانت اغلب ارتباطاتي بالمجتمع معاها الحين اتصل عليها كثير لكن ماعادة مثل اول بس طايره بوهتها مع زوجها.. tsh8 عنوده عاد حاولت انوه افكر وانا اجاوب ان شالله ماتعصبين علي ... :white: |
رد : المشاركه مطلوبه وللاعتذار عقوبه!!
:rolleyes: مرزوق فيحان متعب الخماسي وحش جود الرياض نجود فديتكم والله ماقصرتو ونورت الموضوع ياحلى اعضاء منتدى بالعالم :rolleyes: <<<الذرابه وراها شي ........... نقلب الشريط على الوجه الثاني :mad: 1 إقتباس:
2 متعب س10 اطرف موقف مر بك ؟ إقتباس:
هذا وهو صاير من شوي عجزت تكتبه اجل ولو من مبطي وش سويت :o 3 وحوشه س10 اطرف موقف مر بك ؟ إقتباس:
حاقده عليها ... :confused: 4 جود الرياض إقتباس:
هاه جود وبعدين وش صار ترى تحمست للموقف..... :55: ؟ 5 نجوده إقتباس:
نجوده هزي دمجتس الله يعافيتس وعجلي علينا :mad: تدرون الشرهه على اللي يعاملكم بدمقراطيه وكل شوي من زود ذرابتي اكتب اختياري وانتم عاد ماصدقتو على الله بس هين هالحين بقلبها دكتاتوريه وراح ترجعون تكتبون مواقفكم ... والله لو اني طالبتكم الجنه :confused: ^ ^ ^ ^ الكلام موجه لشلة الشيبان والعجز السودانيين اللي فوق جزاهم الله خير وسلم عمارهم :white: <<<الشرهه على اللي يشارك بموضوعتس |
رد : المشاركه مطلوبه وللاعتذار عقوبه!!
..
|
رد : المشاركه مطلوبه وللاعتذار عقوبه!!
..
|
رد : المشاركه مطلوبه وللاعتذار عقوبه!!
السلام عليكم ...............
عنود الصيد الموضوع فكرته حلوه وتخلي الواحد يا أخذ صوره اوسع عن الاعضاء بسم الله نبداء / ج1/ الاسم : سلطان الخامسي ج2/ العمر 23 سنه ولله الحمد ........ ج3/ اللقب خارج المنتدى : سليطين _ ابو خالد _ المزيون خخخخخخخخخ ج4/ المؤهل الدراسي : دبلوم صيدلة ج5/ الوضيفه : مساعد صيدلي ج6/ الهوايه : الشطرنج _ بلايستيشن كره قدم _ طلعات البر _ وقراءة المجلات الشعريه . ج7/ برنامجي اليومي : مره في المكتب _ مره عند الابل _ مره في البيت _ اطلع ادوج في شوارع الرياض لاطفشت . ج8/ اولاً : دهن العود ثانياً : الور سبورت (( شانيل )) ج9/ افضل بيت : الابيات كثيره بس فيه بيت يعجبني .... ان عشت عشت بعزتي وإن مت ماقالو ذليل ........... وإن ما مدحني صاحبي اقفى وهو ما سبني لفلذت كبدي متعب الخامسي خخخخخخخخخ ج10/ اطرف موقف : مره كنت انا و واحد من ربعي اسمه سعد كنا في مخيم في روضه خريم ايام المطر ذي كنا نايمين في المخيم وقمنا من النوم بدري قبل الفجر وكانت الفيضه مليانه ماء وصايره كنها بحيره والمخيم قريب من الفيضه مو بعيد قال سعد : تعزم يا سلطان نروح نسبح في الفيضه لين تطلع الشمس ونعود للمخيم ......... ما تصمل ؟ قلت : قدام بس ما معنى سراويل سباحه؟ (( ونا ماودي اروح اسبح بس قالك اني صامل )) قال: عادي يابن الحلال بسروال الرياضه اللي عليك الله وكبر لازم سروال سباحه ؟ قلت : يالله مشينا انت تهايط على في هالصبح وانت منت سابح اعرفك يالله افسخ فنيلتك وامش قدامي للفيضه ان كانك صادق ؟ قال : يالله مشينا المهم صارت الدعوى تحدي ............ من الفضاوه فسخنا فنايلنا ومشينا للفيضه على ان كل واحد انه صامل ومهوب راجع في كلامه طبينا في الماء الماء شكلها من بعيد نضيف بس تطب في وسطها انواع اوراق الشجر وقواطي الببسي وملاعق بلاستيك ..... الخ ادوات المكاشيت...!!! سبحنا وجاز لنا الجو طلعنا من البحيره وتكينا على الشاطئ خخخخخخخخخ وقعدنا نسولف وسرقنا الوقت وحنا مادرينا المهم شفنا سيارتين وقفت عند المخيم من طلعو ابوي وعمي توهم واصلين ؟ قلت لـ سعد ياليل وش جابهم الحين؟ وش السواة وشلون نروح للمخيم وحنا ما علينا فنايل وسراويلنا بنيه من الطين؟ قال سعد : والله مدري وش رايك تروح انت وتجيب فنيلتي وتلبس فنيلتك وتجي عااادي ابوك وعمك ؟ قالت : البلا ابوي وعمي ابوي بينقد على وبصغر في عينه وعمي بيقول : هذا خبيل يطامر في الخليان ماعليه فنيله المهم صملنا انا نروح من ورى ونجي المخيم من الخلف بس المشكله لازم نشطف عائله مخيمه جنبنا .....!! قلت لـ سعد تعرف تركض؟ قال : ازهل قلت : الحين انا بركض قدامك واذا شطفنا العائله لا تطالع تراهم يعرفونا ؟ حطيت رجلي والبرررراد ينفضني توني ماخذ حمام قواطي مع مويه بنيه خخخخخخخخ المهم شطفنا العائله العائله على حجاجي الايمن وابوهم طالع برى الخيمه يحمي سيارته مدري وش قصته ؟ المهم سمعته يقول لمنا وجع وجع وجع هيه انتم وشفيــــــــــــكم ؟ انا مزلب واركض واسمع الدب سعـــد يضحك وكعيتها ضحك خخخخخخخخخخخخخخخ احس ابو العائله يقول : والله انهم مهوب مضبوطين خخخخخخخخخ المشكله يوم وصلنا المخيم من الجهه اللي ورى لقينا ابوي وعمي يتمشون في المخيم وقزونا خخخخخخخخ وانا احاسب حسابي انهم في بيت الشعر ............ !! ابوي قال انتم منوين جايين ؟ انا قلت خربانه خربانه قعت اضحك انا والدب خخخخخخخخ وقلت له السالفه وكما توقعت طحت من عينه لا وبعد شاتني يوم طحت خخخخخخخخخ وسلااااااااااامتكم اج11/ اصعب موقف : مواقف الفيصليه هههههههههههههههه الحمد لله مواقف صعبه قليله جدا وما اذكر شئ حالياً مشكوره على هذا الموضوع عنود الصيد ولا تشرهون الواحد تجيه مسكات مالها سنع احياناً خخخخخخخخخ شكرا |
رد : المشاركه مطلوبه وللاعتذار عقوبه!!
إقتباس:
ههههههههههههههههههههههههههههه هههههههههههه أول مره اشوفك معصبه ..<< دايمن تشوف عنوده ريلاكس عل آآآآآآآآخر ههههههههههههههههههههههههه ههههههههههههههههه الله ياخذ بليسك ..العجز السودانييين .. بصراحه مب دايمن يعيروني أهلي بس أبي اعرف من علمك بمعيارتي ... :mad: ولايهمك ياقمر مب بس أجيب لك موقف طريف أجيب لك كل مقاطع الفيديو اللي مصورتها لاخوي الصغير وهو يقلد الفنانات .. :white: << خراب السفن |
رد : المشاركه مطلوبه وللاعتذار عقوبه!!
هاي تحمست اشارك معكم س1 الأسم في المنتدى الكنيه (واذاتبي تعطينا اسمك الأول ياليت)؟ راعبية والاسم نوف وعاشت الاسامي س2 العمرالحقيقي ؟ 24 س3 اللقب المفضل لديك خارج المنتدى ؟ نافنووف س4 المؤهل الدراسي ( اختياري)؟ بكالوريوس حاسب الي س5 الوظيفه (اختياري)؟ كنت خدمة عملاء وحاليا عاطله باطلة س6 الهوايه المفضله ؟ كتيييييييييير منها النوم , السباحه , احب كمان الجيت بوت والجيت سكي س7 برنامجك اليومي؟ اصحى 7 بالليل بعدين اطلع افرفر بالشارع بعدين ارجع البيت واجلس على النت لحد 7 الصباح بعدين اشوف التلفزيون لحد الظهر بعدين انام 1 الظهر وهاكذا (هذا بس بالصيف) س8 عطرك المفضل ؟ كتيييير واخر شئ نارسيزو رودريقوز س9 افضل بيت شعر سمعته ؟ انالامن دعيت..الله يجيبك زدتني بإبعاد رح الله لا يردك يمكن الدعوات مقلوبه س10 اطرف موقف مر بك ؟ اغلب مواقفي اللي تضحك اني اطيح بالشارع واخر مره عازمه اهلي على مطعم فرنسي بجده لي شهر اعزمهم وما هم فاضين يروحون بدري لان المطعم يسكر بدري المهم هذك اليوم واصر انو نروح للمطعم طبعا بكم اني انا اللي عازمتهم لازم انزل قبلهم واشوف الطاوله اللي انا حاجزتها دخلت المهم وانا طالعه اناديهم واطيح عند الباب على الزفلت من الاحراج قمت بسرعه لحد يشوفني بس سواق ليموزين شافني واهلي طبعا بس الجرسون اللي يفتح الباب حمد الله ما شاف والله من الالم ما اذكر طعم الاكل وبس س11 اصعب موقف (اختياري)؟ اصعب موقف يمر علي ويتقطع قلبي من جد لما اشوف شخص كان مره قوي يمشي الناس على كيفه والكل يحترمه ويحسب له حساب وفجاه تلقاه ما يدري عن نفسه ويصير عاجز ومنهم جدي الله يطول بعمره و يشفيه اموووووووووووت لما اشوف حالته الحين وبس :) |
رد : المشاركه مطلوبه وللاعتذار عقوبه!!
ثامر الشعيفان يحياك اخوي ونووورت الموضوع وماقصرت على المشاركه وربي مت ضحك على الموقف الطريف :white: |
رد : المشاركه مطلوبه وللاعتذار عقوبه!!
ياهلااااابك سلطان وبمشاركتك ومشكور على مرورك العذب إقتباس:
ومرره ثانيه تسلم يالمزيووووون<<<تقول ياعيني على الثقه بس :white: |
رد : المشاركه مطلوبه وللاعتذار عقوبه!!
إقتباس:
نجووووده مو معصبه بس امزح معكم :rolleyes: <<<لاعمرتس تمزحين |
رد : المشاركه مطلوبه وللاعتذار عقوبه!!
راعبيه حياك والله .. وماقصرتي بالمشاركه ومنتظرين مواقفك ... وياهلاااااااابك مره ثانيه |
رد : المشاركه مطلوبه وللاعتذار عقوبه!!
يعطيك العافيه يانجود محتاجين مثل هالمواضيع اللي تحرك الاستراحه شوي س1 الأسم في المنتدى الكنيه (واذاتبي تعطينا اسمك الأول ياليت)؟ نواف الشمري واخواني واصدقائي ينادونن ابو نوف واللي يمونون يقولون زيدان ومن اول ايام الابيض واسود كانوا يقولون لي الصعيدي .. نسبه الى ( حارة الصعايده ) حارتنا منذو مبطي tsh4 اما شلة الاستراحه يسموني اكـّان <<-- نسبه الى حظي الصهيوني بالبلوت tsh5 س2 العمرالحقيقي ؟ الحقيقي 26 .. والحقيقه الحقيقه لي كم سنه وانا ثابت على هالعمر tsh6 س3 اللقب المفضل لديك خارج المنتدى ؟ س4 المؤهل الدراسي ( اختياري)؟ س5 الوظيفه (اختياري)؟ س6 الهوايه المفضله ؟ في المدينه احب الكوره حب جنوني .. اما في البر واجد الهوايات .. على راسها القياده والتطعيس .. والنيشان وهذي ادمنت عليها تالي س7 برنامجك اليومي؟ س8 عطرك المفضل ؟ ديور اديكت س9 افضل بيت شعر سمعته ؟ انا رفيقك بالليال المعاسير .............. والا ّ الرخا كل ٍ يسد بمكاني س10 اطرف موقف مر بك ؟ كثير .. واطرفها يوم اصدم عسكري واقف يخطط حادث سيارتين وهو واقف بنص الشارع وانا جاي مع اللفه بس ماكنت مسرع الوكاد اني قلتبه :white: بس عدت س11 اصعب موقف (اختياري)؟ . |
رد : المشاركه مطلوبه وللاعتذار عقوبه!!
س1 الأسم في المنتدى الكنيه (واذاتبي تعطينا اسمك الأول ياليت)؟
عبدالرحمن الكنية ابو رياض او ابو عيون او رفيق الحزن ... س2 العمرالحقيقي ؟ الاعمار بيد الله :) س3 اللقب المفضل لديك خارج المنتدى ؟ ابو رياض س4 المؤهل الدراسي ( اختياري)؟ دبلوم الدراسات الفنية tsh1 س5 الوظيفه (اختياري)؟ من اللي جاهم راتب شهر :55: س6 الهوايه المفضله ؟ الشعر قرائة وكتابة - الكورة بانواعها - النت - الذبات على الشباب tsh4 س7 برنامجك اليومي؟ صحيان بدري _ دوام _ غداء - نوم _ مشاوير عائلية _استراحة ونت _ نوم _ صحيان بدري وهكذا ... س8 عطرك المفضل ؟ اي عطر يعطونيه الهنود اللي فالاسواق في الكروت اشمه واشتريه >>>>>>> يحسبة لا زم تشتري اذا بخوا لك منه tsh4 س9 افضل بيت شعر سمعته ؟ ياطاري الغدران والعمر رشفه .........مع قلها ياليتها يوم تصفي !! للبدر ........ س10 اطرف موقف مر بك ؟ الموقف هذا صار لي اليوم كنت جاي الظهر من الدوام وطلع علي واحد من الشباب االصغيرين ابو قصات وشعور مدري وش تبي tsh8 وتفاديته باعجوبة ووقفت من الروعة وطالعت في المراية الا اخينا في الله واقف وكني انا الغلطان واقوم واخم الريوس وانزل من السيارة واجي باتفاهم معه :o قال خير قلت له انت اللي خير هذي سواقه هذي ويوم قربت منه انحاش :confused: وبصراحة انحرجت :rolleyes: وما لحقت الا على صدام سيارته واشوته :o وبغيت اطيح فالشارع بس الله ستر ولا تفشلت :( وياشين التعصيب احيانا يودي في داهية .. tsh4 tsh4 tsh4 tsh4 س11 اصعب موقف (اختياري)؟ وافاة والدي رحمة الله واموات المسلمين وانا معه في المستشفي .. الف شكر يا عنود الصيد على هيك مواضيع ... |
رد : المشاركه مطلوبه وللاعتذار عقوبه!!
إقتباس:
تسلم نواف وياهلاابك لو ان اسمي العنود مو نجود بس شكل الشوف شجر الى هالحين :rolleyes: |
رد : المشاركه مطلوبه وللاعتذار عقوبه!!
. يامال العافيه ياعنود موضوع رايق ومرتب لي يومين ابي اشارك بس مدري وش يردني :) نجي للأسئله س1 الأسم في المنتدى الكنيه (واذاتبي تعطينا اسمك الأول ياليت)؟ خالد بن تركي البكر س2 العمرالحقيقي ؟ دخلنا 24 رجب ؟؟ اجل باقي لي 6 ايام وارجف بيبان الـ23 سنه :D س3 اللقب المفضل لديك خارج المنتدى ؟ خارج المنتدى يعني قصدك بالنت ؟؟ اذا بالنت بشكل عام انا احب اسم " بحور " اسم لازمني بالنت من 6 سنوات اختاره لي شخص عزيز علي ومن يومها وانا مرتبط دخولي النت بهذا الاسم اما خارج النت فالاغلبيه ينادوني " ابوتركي " وهو الافضل بالنسبه لي س4 المؤهل الدراسي ( اختياري)؟ س5 الوظيفه (اختياري)؟ . س6 الهوايه المفضله ؟ انا انسان مدمن قنوات رياضيه ومجنون شي اسمه بلاي ستيشن .. الدوري الياباني طبعا وبأيام العمل نادر ما امارس اي هوايه يالله النت والسوني وزين ان لقيت وقت س7 برنامجك اليومي؟ بوسط الاسبوع يروح وقتي ما بين الشغل والنوم والنت بالويك اند تكون مشاويري خارجيه .. منيب حول تلفزيون الا باوقات المباريات بس س8 عطرك المفضل ؟ والله كثير بس جازلي عطر او مخلوط جابه لي عبدالله اخوي من الدر المنثور بالكويت اسمه الوردي ريحته تجيب العافيه س9 افضل بيت شعر سمعته ؟ رح وين ما تشتهي رح قد ماتقدر ,, أنا أول الناس في قلبك وانا الباقي الابيات كثير لكن هالبيت طرى علي بوقت كتابة الرد س10 اطرف موقف مر بك ؟ خلني اتذكر بس وارجع ارد على هالسؤال ,, المواقف كثيره والواحد ينسى من كثرهم س11 اصعب موقف (اختياري)؟ وفاة الوالد الله يسكنه الجنه وموتانا وموتى المسلمين والله يعطيك العافيه ياعنودالصيد |
رد : المشاركه مطلوبه وللاعتذار عقوبه!!
إقتباس:
يعافيك يارب وماقصرت يابوتركي وحياك بالموضوع وانشالله تنورنا بموقفك الطريف tsh5 |
رد : المشاركه مطلوبه وللاعتذار عقوبه!!
Excellent subject
Wait for me I will participate as soon as I come back to Saudi Inshallah Get me a hammer I want it to post it :) Just for your sweet eyes :) :) |
رد : المشاركه مطلوبه وللاعتذار عقوبه!!
8 8 أرحمو مشاعر اللي مايعرفون عنقريزي ياهوه :white: س1 الأسم في المنتدى الكنيه (واذاتبي تعطينا اسمك الأول ياليت)؟ أبرار بنت محمد س2 العمرالحقيقي ؟ للحين أتنفس :white: 21 سنه :white: س3 اللقب المفضل لديك خارج المنتدى ؟ تبون الصراحه ( العصلى ) :white: وبوي يناديني( البري ) تصغير أبرار :white: س4 المؤهل الدراسي ( اختياري)؟ فاشله رحت مع عمي للأردن درسة سنه والله يخلف وسقطت ورجعت :white: بس أن شاءالله بكمل السنه هذي وبما أني أنقبلت بجامعة الملك فيصل وعسى الله يسهل :( س5 الوظيفه (اختياري)؟ ابد الله يسلمك عندي (بسطة لبيع الديرم والبراقع ) في السويق واترزق منها :white: الله يسمع منك واتوظف ولاادرس جامعه :white: س6 الهوايه المفضله ؟ سهر نوم لعب كريم واونو مع اخواني الصغار وتشويت الكور بالحوش مع خويلد اخوي ومطارد الجرابيع في البران والتمشي اخر الليل اللي ماله سنع بالحوش :white: الأسواق :white: وبما اني اكبر وحده فهاوش 24 ساعه مع خواتي :white: س7 برنامجك اليومي؟ ماعندي برنامج أبد :white: س8 عطرك المفضل ؟ PUREمن Jel Sander) س9 افضل بيت شعر سمعته ؟ كثير مايحضرني شي :confused: س10 اطرف موقف مر بك ؟ ياكثر المواقف كثاره :white: أذكرمره من المرات انا وأختي مها كنا متهاوشين المهم هي اللي بدأت :white: جتني وانا جالسه ورشت علي مويه :white: وهجت فوق هي رشت ولامارشت :o راحت وأدخلت الغرفه اللي مقابله غرفة أمي وابوي وسكرت عليها الباب وانا رحت للمطبخ واعبي لي ذاك الطاسه اللي مليانه ملي ماء بارد وكنا بعز الشتاء :white: وأجلس أنتظرها ورى الباب الخارجي لغرفة امي وابوي طبعن كان اخر الليل وهي تحسبني نزلت تحت وانا ولاطرى على بالي ادحدر من محلي :white: سمعت صوت باب واالنور مطفيته حق الصاله حتى أنفاسي كتمتها :white: ويوم طلعت الااتوشحها بالمائ البارد ولاسمعت الاحسبي الله عليك طلعت إمي مهيب مها :white: انا وشحتها وهجيت ويوم سمعت صوت امي ورجع واحب راسهاو اتسامح منها وتطلع مها تضحك علي :white: س11 اصعب موقف (اختياري)؟ مافي بالي شي :white: |
رد : المشاركه مطلوبه وللاعتذار عقوبه!!
فيصل الخالد thanx for ur nice words brother and we are looking forword to see ur participation يووووه تصدقون من زمان ماكتبت عنقليزي :white: |
رد : المشاركه مطلوبه وللاعتذار عقوبه!!
مووودي=مضاوي tsh3 ياهلااااااااااابتس الغاليه ونووورتي الموضوع ويازين مواقفتس اللي تهبل وربي مت عليتس ضحك يالمرجوجه زين ماكبيتي الماء على ابوتس بعد :white: |
رد : المشاركه مطلوبه وللاعتذار عقوبه!!
س1 الأسم في المنتدى الكنيه (واذاتبي تعطينا اسمك الأول ياليت)؟ محمد الحراب العريني س2 العمرالحقيقي ؟ 25 صيفا :o س3 اللقب المفضل لديك خارج المنتدى ؟ الحراب س4 المؤهل الدراسي ( اختياري)؟ بكالوريس علاج طبيعي س5 الوظيفه (اختياري)؟ Jobless :eek: س6 الهوايه المفضله ؟ قراءه الشعر. س7 برنامجك اليومي؟ والله برنامجي هالأيام ما يسر لا عدو و لا صديق... tsh7 س8 عطرك المفضل ؟ Dunhill س9 افضل بيت شعر سمعته ؟ فأمطرت لؤلؤاً .. من نرجسٍ .. و سقت ............. ورداً .. و عضّت على العنَّاب بالبردِ.... ليزيد بن معاويه... tsh3 س10 اطرف موقف مر بك ؟ رد لأحد الاعضاء ... معناه.. على النقيض من مقصده... tsh7 و اتصلت عليه و ضحكت ضحك مبطي ما ضحكته... و هذا موقف ثاني: مره من المرات جيت انا و اثنين اخوياي بالدوام... لابسين بدل رسميه و اللاب كوت.. طالعين من الغداء.. و دخلنا المسجد نصلي الظهر.. الا هذا الرجال اللي يصلي لحاله... و نجي نصف وراه.. و هو ساجد.. و نكبر و نسجد.. يوم جاء يقوم من السجود... من الحماس قال : ( سمع الله لمن حمده..) :mad: .. الظاهر اول مره يصير امام... :55: و اذنك ما تسمع الا ضحك... الله لا يعاقبنا... tsh7 قطعنا الصلاة.. و من الفشيله رحنا نصلي في القسم... لا يشوفنا الرجال... :o س11 اصعب موقف (اختياري)؟ الايام هاذي كلها صعبه...و كلها مواقف بايخه... الله يعديها على خير...<<<< شوي و يطق البتسوه و يطلّع صك الاعسار... :( ..................... برايفت نواف... ياخي من الخط اللي انت مختاره في ردودك احس انك متعلم في الكتاتيب... بعدين ليش توقيعك صغير.. والله لو مجهر الكتروني... ما يدري وش انت كاتب ... نواف ... و ربي فيع خيارات اوسع.. جرّبها.. |
رد : المشاركه مطلوبه وللاعتذار عقوبه!!
محمد العريني الله يحييك اخوي وياهلابمشاركتك إقتباس:
انشالله يعديها على خير وماتشوف شر اخوي :( |
رد : المشاركه مطلوبه وللاعتذار عقوبه!!
<<<<<<<<<< يكتب الرد وفي يده تقرير طبي ذالن من العقوبه :white: الله لايعاقبنا يالعنود الحين هالمساكين الزوار وش ذنبهم اذا ما شاركوا :white: <<<<<<<< تحسون انه كبر الموضوع ورا ما تلفقه يابو الشباب طيب :rolleyes: س1 الأسم في المنتدى الكنيه (واذاتبي تعطينا اسمك الأول ياليت)؟ حسن بن عبدالله ال مسفر العمري <<<<<<< راك الاسم كله يابو الشباب ورا ماتحط صورة البطاقة اصرف :white: رقم السجل المدني ؟؟10336199 ^ ^ حاط الاستفهامات اقتداءً بلوحات المواتر المعروضه في اعلانات جريدة الرياض يعني باقي رقمين :white: س2 العمرالحقيقي ؟ بالهجري 31 سنه وبالميلادي 25 سنه :white: س3 اللقب المفضل لديك خارج المنتدى ؟ ابو ابوي يعني ابو عبدالله :white: س4 المؤهل الدراسي ( اختياري)؟ دبلوم اعمال مكتبية س5 الوظيفه (اختياري)؟ مشرف اجتماعي تحسون الوظيفه مالها اي علاقة بالمؤهل زين اللي جت على كذا لاني كنت اتوقع يحطوني مدرس تعبير :white: س6 الهوايه المفضله ؟ القراءه بكل انواعها يعني قاعد ولا واقف ولا منسدح :white: ، الرماية بالسلاح الناري والهوائي << ابوك يالهياط :white: ، والسباحه في البانيو :white: س7 برنامجك اليومي؟ وجهاً لوجه :white: لا والله الحقيقه برنامجي اليومي حسب شفتي في العمل يعني لا صار الشفت صباحي يكون الليل نوم واذا كان الشفت ليلي يكون النهار نوم <<<< خلوها على الله والله ما عرفت اضبط جدولي مع هالعمل يازين الدوام العادي والدوام لله :white: س8 عطرك المفضل ؟ AV س9 افضل بيت شعر سمعته ؟ والله واجد الابيات بس منها بيت للبدر يقول ياسيد الناس كلٍ لابسن بزه ********** صعبن تفرق مابين الخبل والصاحي س10 اطرف موقف مر بك ؟ واجد المواقف بس فيه موقف صار لي من فتره قريبه وهو اني كنت في سيارتي رايح لمشوار وقاعد اكلم واحد من الشباب ابيه يروح يجيب غرض من محل بعيد عني وهو مايدري وين موقع المحل فيه فقلت اوصف له المهم اني قاعدن اوصف له المحل وطول التوصيف وهو ذبحني عجز يفهم الوصف ومن زود دجتي مع المكالمه اثاريني قاعد اتجه للمحل اللي اوصفه لخويي حسب الوصف وقاعد اقوله اذا جتك الاسواق الفلانيه تلف يمين والف يمين وبعد الاشارة تلف يسار والف يسار ووقفت الموتر واناظر الا انا وصلت للمحل اللي قاعدن اوصفه لخويي وانزل واخذ الغرض اللي ابيه وارجع للموتر واكلم خويي واقوله خلاص لا عاد تجيب شئ الله لا يجيبك يالبعيد :white: س11 اصعب موقف (اختياري)؟ وفاة والدتي رحمة الله عليها |
رد : المشاركه مطلوبه وللاعتذار عقوبه!!
إقتباس:
مشكوره كثير :rolleyes: |
. هلا ياخييه .. خوش موضوع والله ! والله نفيستي هاليومين اللي راحن ماهيب لهناك .. قلت لمن أروق .. ادخل وأتبيثر عليكم بهالموضوع !:) س1 الأسم في المنتدى الكنيه (واذاتبي تعطينا اسمك الأول ياليت)؟ عبدالله .. والكنية : بو سعود ! والعيال بالمنتدى ينادوني : عبيص لا تهورو .. وعبود لا كانوا معصبين .. ومرات أطلع بو سيقان .. يعني على حسب الطقس :) س2 العمرالحقيقي ؟ أفسفسه بالعافيه ياربي :) ! س3 اللقب المفضل لديك خارج المنتدى ؟ والله العيال ينادوني : عبيد .. ولا مسكت حنان عبادي :D س6 الهوايه المفضله ؟ انا الديكور يذبحني .. صحيح إن ماعندي وقت لأشياء كثيرة لكن أكثر ما يشغلني هو الديكور .. لا بغيت أحوس وأدوس بهالكومادينات والكباته على بالي بأخترع زي جديد مالت :( ولانيب راعي كورة امحق .. بس مطالع الأفلام هذا شي لا بد منه .. " الله المستعان " :( س7 برنامجك اليومي؟ داوم بيت ديوانية دوام ! س8 عطرك المفضل ؟ هبنتك بويزن من بيور .. سكادا << لا بغيت أنعنش ! والمخلطات أكيد .. س9 افضل بيت شعر سمعته ؟ وشلون لا قالوا لي الناس وش جاك .......................من كنت في لـذة منامـك تنـادي .. متعب التركي .. س10 اطرف موقف مر بك ؟ بيت واحد من العيال الجديد .. ما ادله ! وأنا عجل بآخذ منه غرض فدله يصوفلي بالتلفون وأنا نص ساعه جالس أدور على الحارة ومن يمين في يسار .. وبالتلفون مغير أسب وألعن فيه .. وأقول له : إنت وبيتكم هالمسابقة اللي أول ماأوصله بيطلع أبوك يسلمني جايزة عن الباب ! وبحدى اللفات شافن .. قال إرجع إرجع شفتك وبتلقى سيارة مشغله انورها .. يوم قال كذا سكرت بوجهه ! ولفيت .. والله وألقى لي ذيك السيارة اللي مولعه أنوارها .. وأسحب الجلنط عندهم وانزل بوسط الشارع أقول : فززززززت فززززززززززت .. وأقرب أبي أستلم الجايزة .. إلا والله ذاك المطوع وثنين من اخوانه tsh8 شوي اللي الرجال يدق علي بالتفون ! tsh7 الا واحد منهم يجبر بخاطري ويقول : حنا اللي فزنا بشوفتك tsh9 وأتعذر وأتفشل وتصير حالتي حاله .. والله لا يبارك بتوصيف بيت هالشين رفيقي اللي تقل لعبة الحيه tsh8 . |
رد : المشاركه مطلوبه وللاعتذار عقوبه!!
إقتباس:
هلاااااااابك ابورياض وماقصرت على مرورك الذرب ومنور الموضوع كله يا رفيق الحريري ..يؤؤؤ قصدي رفيق الحزن :white: |
رد : المشاركه مطلوبه وللاعتذار عقوبه!!
إقتباس:
حسن المسفر شكرا لمرورك الكريم ويارجال احمد ربك عندك وظيفه حتى لو مدرس تعبير <<<تبي تعطيه عين :white: ترى انا الضعيفه مالقيتلي وظيفه مع اني متخرجه من زمان .. اجل لي هالحين ثلاث شهور متخرجه ماوظفوني <<ياكبر الشرهه :rolleyes: |
رد : المشاركه مطلوبه وللاعتذار عقوبه!!
إقتباس:
هلابك ياقلبي ومنووره ولايهمك كل مره بلطش عشانك :rolleyes: |
رد : المشاركه مطلوبه وللاعتذار عقوبه!!
إقتباس:
يامرحبا فيك والله يابوسعود وتسلم على المشاركه ..وبالنسبه لعبيص عادي ماعليك منهم ترى حنا بالسعوديه اي عضو فعال بالمجتمع لازم يحطوله عياره<<ترفع معنوياته :white: |
رد : المشاركه مطلوبه وللاعتذار عقوبه!!
س1 الأسم في المنتدى الكنيه (واذاتبي تعطينا اسمك الأول ياليت)؟ الوتين <=== لها اسمين اسم الناطقين به واسم ثاني مدروج بالاوراق الرسميه مهيب تحبه العمرالحقيقي ؟ ؟ وعشرين س3 اللقب المفضل لديك خارج المنتدى ؟ المفضل وتين س4 المؤهل الدراسي ( اختياري)؟ حاسب الي س5 الوظيفه (اختياري)؟ حاليا ادوج بملفي المخوضر بكل مكان سابقا برنامج الامير محمد بن فهد الصيفي بالله احد عنده وظيفه :) س6 الهوايه المفضله ؟ قراءة الشعر ويمكن بعض الكتب ومدمنه للافلام الاجنبيه س7 برنامجك اليومي؟ حاليا سهر لين الفجر ثمن اصلي وانام واوعى الساعه 9 \ 11 الصبح على حسب اذا به طلعه او لا وبعدين اتصال مع البنات وتخطيط الاجتماع وين والسهره وين اكمل الصبح على الظهر اناظر افلام الاجنبيه العصر قهوه وشاي وتخطيط لطلعه المغرب دوجي بالاسواق الساعه 9 \10 نجتمع في المكان المحدد لين الفجر س8 عطرك المفضل ؟ برايفت كولكشن + عطر من عبدالصمد القرشي اسمه جميره س9 افضل بيت شعر سمعته ؟ حنا الاشراف والجزيره وطنا .. ربي خلقنا للقبايل عقوبه :rolleyes: اذا ماخنتني الذاكره + قصيدة الشاعر الامير خالد الفيصل من بادي الوقت واكثر مااردد فيها هو إلى صفالك زمانك علّ يـا ظامـي اشرب قبل لا يحوس الطين صافيها الوقت لو زان لك يا صاح ما دامي يا سرع ما تعترض دربك بلاويهـا حتى وليفك و لو هيّم بـك هيامـي سيّور الأيّام تجنـح بـه عواديهـا س10 اطرف موقف مر بك ؟ يوم ادج على وجهي في شارع الحاره قدام سيارة شباب متكشخين وطلعوا عيال الجيران الله لايوريكم الفشيله وذاك الضحك اللي ملا الحاره :rolleyes: س11 اصعب موقف (اختياري)؟ يوم القن ابوي الشهاده وموته في حظني مشكوره العنود لطشتك مره حلوه عفاك الرحمن |
رد : المشاركه مطلوبه وللاعتذار عقوبه!!
مساكم الله بالخير . وفكره طيبه ياالعنود
وبــخــتــصـــار استـــــــــــلـــــــــــمــــــــــــو س1/عبدالله س2/27 س3/ العناد س4/ مؤهل بسيط س5/موظف في سكيكو س6/ الرياضه كرة قدم مع العلم اني في احد الأنديه س7/بخور أمي س8/خلوه نايم واليالي تصحيه ..... يفز من نومه بليا منادي 10 / 11 اسمحو لي الله يعافيكم ومشـــــــــــكــــــــوره ياالعنود ... والله يعطيك العافيه |
رد : المشاركه مطلوبه وللاعتذار عقوبه!!
احلىىىىىىىىى سلام للناس الكويسه
والناس الاكوس من الكويسه رجعت لكم وتووووووووووووبه ما افارقكم يعني قعده على قلوبكم للسنه الجايه س1 الأسم في المنتدى الكنيه (واذاتبي تعطينا اسمك الأول ياليت)؟ فيصل الخالد س2 العمرالحقيقي ؟ 35 س3 اللقب المفضل لديك خارج المنتدى ؟ بو خالد س4 المؤهل الدراسي ( اختياري)؟ ماجيستير علوم ادارة فن الرسم البياني "ابوووووك يالتعقيد " س5 الوظيفه (اختياري)؟ قهوجي في شركه اهليه س6 الهوايه المفضله ؟ الضحك :) س7 برنامجك اليومي؟ شغل بيت بيت شغل محمد الشهري شغل بيت بيت شغل محمد الشهري واحيانا عبيص :) س8 عطرك المفضل ؟ كارتيه ديكليريشن المركز وديه اند جيه القديم وجيل سندر القديم وبولجري وبربريز الاسود واي شي حلو لاني مدمممممن عطور ودهن عود س9 افضل بيت شعر سمعته ؟ الابيات كثيره مره ما يحضرني شي الحين س10 اطرف موقف مر بك ؟ مره كنت في المريديان حق البحرين والساعه 2 ونص الصبح واشتقت لهارديز فجاءه طلعت وجبته وقلت باكل وانا اطالع التلفزيون المهم شريته ورجعت الفندق وانا داخل الفندق الا اشوف واحد شكيت اني اعرفه عند الباب الي يدور وانا التفت عليه ينقال لي بابتسم له وما التفت مره ثانيه الا الباب في خشمي ويحلفون المشرومه في جهه والعقال في جهه وسويت لهم سباحة الفراشه في اللوبي :) تعشيت وسويت شك اوت خفت احد يشوفني الصبح من الي شافوني بالليل :) س11 اصعب موقف (اختياري)؟ موت يوسف ولد خالتي الله يرحمه ويغفر له وموتى المسملين جميعا عنود موضوع اكثر من رائع يعطيك الف مليون عافيه |
رد : المشاركه مطلوبه وللاعتذار عقوبه!!
فيصل الخالد شكر لمرورك الكريم ومشاركتك وياهلااااااااااابك |
| الوقت المعتمد في المنتدى بتوقيت جرينتش +4.
الوقت الان » 00:18. |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع ما يكتب في الموقع يعتبر حقوق محفوظة لموقع شعبيات- شبكة الاقلاع