الف ٍ اببدا بأسم ربي وذكره =الواحد اللي ما وهبناه شكره
دام انه اللّي قال للموت سكره =يبقى حبل عفوه عن الخلق ممدود
ممدود ماله حـزّه لكثر الاعذار =هذي هي الجنه ترى وهذي النار
اللّي يبي درب السعه يترك الغار =ويا وين ما ياطا لقى ركّع سجود
والبا بعدها يا الحكي جيت اعلمك=انك قليل العرف والناس تجهلك
قبل امس يوصف في معانيّك الفلك=واليوم اشوفك بين يرجد و مرجود
مرجود شفته ناقص وقلت اسفهّ=ما نيب من ياخذ من القول اتفهّ
شفني تعبت من الصبر وارجع شفه=تلقا السنع ياصل وسمـّاعه شرود
والتا تريّـثت بمكان ٍ سطا خوف =يوم النوايا ساكنه بآخر الجوف
واللّي ربوعه ما تقدي له الشوف=يبطي يفرّك لحيته وربعه رقود
رقود محد ٍ قام عقب إنجضاعه =ما قيل لحظه اوقفو يا جماعه
اللّي يسب الناس تلوى ذراعه =الين ينثر سمّه وتشهد شهود
والثا ثلاث ايام مــرّني خفاف =بعده ثلاث ايام مــرّني عجاف
قلت اذكرولي واحدٍ عارف وشاف=قالو طريقك يا ابن الاجواد مسدود
مسدود ما لك غير طرق المثايل =دام الليالي لا حــسبته قلايل
آخير عنك يقال راعي جمايل =ولا.. تـلحـّق .. نيـتك شك وقدود
والجيم جاني من الشعر الف علّه =يومي خذيت دقاق عزّي وجلـّه
واللّي حكى بغيابي الله يحلّه =دامي افرّق صيغة الكاد و الكود
الكود ما هو شي ٍ الكل ياصله =كم مرةٍ جاع وكسر ظهر ناقله
لا برّقت عيني على راعي الجله =يبرد غـليلي نشقـته لي أبـّارود
والحا حمى راسي من القاف واعلنت =اني على دروب المراجل تبيـّنت
اركي على من يرتكي لي وأيقنت =اني غديت لباغي الطيب منشود
منشود علم ولا زهمت الطواري =ما خذت علم اللّي زهتها الخزاري
اطرق قليب ٍ بين جاري و جاري =أضمى لو اني شفتهم صدّر ورود
والخا خلصت من التهقوي بالاحباب =وش فادني يا خطوتي فتحة الباب
من غاب ماني قايل ٍ طوّل و غاب =ومن جا هلابه يبشر بطيّب العود
العود ريحه عند الاجواد ضافي =يبديه لو يمشي من القل حافي
ما كل عرق ٍ لا تبعناه هافي =وما كل قول ٍ لا سمعناه مردود
والدا دريت أن الاماني ولا شي =كم فيه حي ٍ ميّت و ميتٍ حي
يـِبكيني خيّر حدّه الوقت للغي =ويـِبكيني غاوي صيته ينطـّق الدور
الدور ضوقه ما تعذرب أهلها =اسأل بخيص ٍ لا تضايق دخلها
بين السلوم وبين منهو جهلها =عقد ٍ وحيد بجـرّته سبعة عقود
والذا ذراي ومسندي ستة اخوان=ما والله انصى غيرهم والعمر فان
بيت ٍ غدى لملازم الطيب نيشان =أصغرهم اللّي بوقفته تبرد كبود
كبود من جا ينتخي ويشكي الهم=ما قيل له عن حاجتك وشي وكم
والفعل كانه ما وردبك على الجم =ولا جعلها ما تجي سهود و مهود
والرا رميت وثــوّرو كون بقعا =ما اتقي لو تزقع النفس زقعا
بعض الرجال اخيه دجاج صقعا=وبعض الرجال بفزته يفززك زود
زود ٍ على مابك من الطيب و المرّ=كل ما تقول تقر ما ضنّي تقرّ
دام الوجيه اللّي تعنـّى لك تسرّ=خطراً عليك تبيع ثوبك من الجود
والزا زمازيم الحراير بهم طبع =ان وقـّفو هيبه وإن سولفو نبع
واللّي رفع سبع ٍ وّطا بعد سبع=إن الزمن هذا ابد ما منه فود
فود يتوذى منه قاصي وداني =مثله مثل من يتبعون الغواني
ان راح ينبز بالتعاليل زاني =وإن جا تخطـّف وجهه الفين مقرود
والسين سال الدمع من عين خلّي =يقول كانك ناوي تروح قلّي
قلت ان تدري يا بعد كل من لي =انك بعيني لا تبرّقت موجود
موجود دام الله فهق موتي شوي =فارش لك ضلوعي غلا وعازم الضي
ما كل حي ٍ يشبهك يا بعد حي =انت الوحيد ولو تـلقنـّي الخود
والشين شانك ما يقلله شوفك =دامي اعرفك طاهر بطهر خوفك
بذمـّتي من عاشرك ما يعوفك =إلا اذا خيـّره ربه بـ الاخدود
أخدود ناره تستعر والمدى غب =ما والله اتردد عن الله بالحب
بطب لو مدري وش يصير بـ أطب =والله يدري بنيـّتي ان كنت مقصود
والصاد صدت من الهوى كل شفـّي =اتبع دروبه واضح ٍ ومتخفـّي
لين انوشم وشم المحبـّه بكفـّي =وبانت بعيني سلهمت ناعم العود
العود ليـّن لا تخاوى مع الريح =قام يتثنـّى تحسب انـّه يبي يطيح
كنه طفل اقبل على امـّه يصيح =توّه يتخطّى بالمشي وناسه قعود
والضاد ضرّه عشقه وصار هالك =كل ما طلبته عزّته قال جالك
أحزن عليه ان قلت له كيف حالك =قال بوجودك فرحت ايامي تعود
تعود دامي يا خليلي على البال =ما قمت امسح دمع عيني إلى سال
عزّيل من يمسي وهو يدرج الحال =ويصبح يلاقي خلـّه بيوم مفقود
والطا طرى لي بيت راعيه خلاّه =يقول لو اني حجر مقدر انساه
بكيت جاني من البكا نفس ماجاه =الله يرحم من سكن في ثرى العود
العود يوم العود ياخذ مكانه =وسطه وكن الريح صوت لزمانه
وجدي على شوفه ولمست بنانه =وجد يعقوب ٍ قبل يوسف يعود
والظا ظلاله كل ما جيت امدّه =قمت اذكره يوم يتمدد بحدّه
يومه يقول الناس تشري المودّه =كم واحد ٍ ضاقت به ايامه السود
السود ما هي يا وليدي قليله =تحط رجلك ثم ترجع تشيله
حذراك تاقف وانت راعي طويله =إلا عصب ظهرك عن الناس مشدود
والعين عيا وقتي ارتاح عيـّا =كل ما اقول اعدّله ما تهيـّا
ان جيت فل حجاجه وقام حيـّا =وإن قمت اشكي هز لي راسه ينود
ينود ماهي قولتي ليتي اقوى =عشان ازيّف ضحكتي وانطق اشوى
دام الحقايق ما لها اي جدوى=بقول يا جلدي بقت ستة جلود
والغين غبت عن الوعي وغاب صوتي =ولا طلت حتى لذتي في سكوتي
دام العواذل بشروني بموتي =وش عاد تفرق لو نهش صدري الدود
الدود ضيم ٍ ما يجي لك على ليت =كم راح قرم ٍ غبنته جابته ميت
أشـّرت بيدي للورى يوم لدّيت =ويمّنت عن درب ٍ مواريه مكدود
والفا فليت اقصى مكان ٍ على ماش =كنت احسب ان مخايلي للمطر ناش
يالله دخيلك كان لي حظ الارماش =غير اتكالي بك ترى ما بي العود
العود ما يغني ولا يسمن الجوع =كان الليالي ما نثرنـّي لك دموع
ان ما حصل من خشيتك ترجف ضلوع =ولاّ يقــيّد في جهنـّم لــه قيود
والقاف قلت الشعر ما فيه طوله =إلا بمن حس النقص في فعوله
دامه كلام الكل يقدر يقوله =خلـّه كلام ولا تماري به النود
النود خيره كم لقــّح سحابه =الله ذكرها معجزه في كتابه
والشعر كذب فيه صدق يتشابه=وما كل من يطرق معانيه محسود
والكاف كف الرجل لو ما يمدّه =مكانته حتى البهايم تسـدّه
أهون علي أخج صدري و أقدّه=ولا يلحقن من هرجة الناس منقود
منقود وزره لا بغاه الدليله =يجيب لك كانه نبيه ٍ حصيله
هذاك وجهه بس يسوى قبيله =وهذا عن وجيه الرجاجيل مطرود
واللام ليت الناس للناس ليته =الكل يضحك مبتسم لا لقيته
ما كان احد ٍ قافل ٍ باب بيته =ولا كان احد ٍ يلحـِق صدوده صدود
صدود صارت بين كل الخلايق =ما فيهم اللّي لا نشدته متضايق
عزاه يا وقت ٍ نسف به رفايق =الكل صار حجاجه اليوم معقود
والميم مير الناس ما هم بـ الأول =كل ما لها الدنيا للأردى تحوّل
كم واحد ٍ على لسانه يقوّل=وكم واحد ٍ زكـّي وطيحاته شهود
شهود ما تنسى لو الوقت أبطى=تجزل على المعطي ثمانين معطى
واللّي على غفله من الناس أخطى =بينه وبين الله مواثيق وعهود
والنون ناحت بين الأضلاع ورقا =ما سرها علم ٍ تواليه فرقا
مر ٍ توقـّف وسط حلقي وترقا =ومر ٍ تجيب أقصى المعاليق بركود
ركود لا كنـّه تفت الحشا فت =تسمع بها صوت السواني إلى جت
دام العمر مثل الشجر باكر يحت =خل أسمك بطرق المواجيب معدود
والها هفيت وقدرت الله انقذتني =يوم الهموم جزالها فوق متني
دام الدروب اللـّي قرتني قرتني =ببقى الكريم اللّي عن اقرابه يذود
يذود بـ اللّي يملكه سر و إجهار =ما داس حرمه ولا تنصّل ولا جار
واللّي تنزّه بـ المفالي عن العار =كل ما شكر ربـّه على نعمه تزود
والواو والله رحمته بي كبيره =أحمده ما خيب رجى مستجيره
يوم العرب كلن تسنـّد بغيره =قلت انت ربي دبرتك ما لها حدود
حدود محد ٍ غيرك اللّي درابه =يا عالم ٍ بأقصى الضماير ومابه
اللّي كتبت شفاه يبرى صوابه =عمر الأمل ما ينقطع وانت موجود
واليا يا ربي وانت شايف مكاني =وتدري بشكري لنعمتك و إمتناني
بعــزّتـك داخل عـليك بهواني =تغفر ذنوبي كنـّي اليوم مولود
مولود قبل يبشـّر بجيته مات =ما تعلّقت فيه الخطايا و الآهات
ما قال من كثر التحاسيف عزاة=اليا طلعت روحه بلا نقص أو زود
تمت حروفي بفضل ربي على خير=يوم المعاني سوقـها للفكر غير
وصلاة ربي عد ما بالسما طير =على نبي ٍ بـ الشفاعات موعود ..