هاه يا خلـّي ..!!

كان ودّك بـ البعاد

ما علي خلاف : قـلّي !


وانت كيفك

لا نويت تروح .. رح

رح لـ أاااااااااخر ما توصّل له خطاك

راح تلقى انّي معاك

وراح تلقى الكون كلّـه

يجيبني لك .. من وراك


وانا جالس في محلّي ..!؟

يا متختخه .. وحجاجك الردّاح لا منّه تقوّس
.............. يترك سؤال بداخلي .. معقوله زيّنها الكبر

ما كنت اظن القلب ينضج .. انا خابره متموّس
............. وما كنت اظنّ اسفنجتين الصدر محطوطه بقبر

بس احذري طفل البدو لا طاح بالنعمه يحوّس
.............. ويكره كثير إن الأماني الجيّده .. تُشبر شبر

توّي عرفت ان النظر لو ما انتبهنا له يسوّس
.............. وإن الحنين اللي عقوقه يقتلك فجأه يـبر

وإن القمر لو ما احتياجه للسما ولليل نوّس
............. والشمس تحرق نفسها والأرض ما طقّت خبر

عمرك سمعتي بيد بين اصابعه فم و يبوّس
.............. هذي يدي لا صافحت يدّك .. وطقطقها الصبر !

للذكريات .. وخفيف الدَّم يا جدّه
................... شي ٍ يحد الخفوق ... وشيٍ آحدّه

لن الأماكن ابد ما عاد تاسعني
................. وانا عرفتك رخاء في تالي الشدّه !

ما كنّي إلاّ شبيهي يوم توديعك
.................. وما كنّك إلاّ انا .. واحسبها بالمدّه :

يومي أهز الضلوع والعن اشيائي
................ والصوت ياصل الين اقصاه وآردّه !

شوفيني حالف ازورك بالسنه مرّه
................ واقول واحشني بحرك .. تسألي شقدّه؟

واقول من دون قدّ .. وتنطق عيوني
................. قدّ الحنين ..وعتاب النفس والصدّه !

لاني بأول جريح ٍ ... يزهد بثاره
................. ولاني بآخر حبيب ٍ .... يكسره ودّه !

اعلمك يا صاحبي ليه انا جاي

مجنونه وحبت مجنون
............. مو نزوه ويا ليل اللّون

إلا حب راهي ومتهندم
.............. من ارقى مصحّه بالكون

قالو مرّه نسوي حفله
.............. ونتنكّر بس لين نمون

جت يمّه وريحتها زعتر !
.............. وجاها وهو فايح كمّون !

والحب اللي يبدا بموقف
.............. مثل اللي راكب بالون

يشوف الدنيا كتير زغيره
............ وليك اسبوعه بسبع قرون !

حاول يعني يسوّي فاهم
............. ومسّاها بكلمة " باردون "

وسوّت فيها تبغى تشخّص
............ لبست له( كرته )و( شيفون )

ضحكتها عنده بالدنيا
............. ولو يضحك خار المزيون

ومن يلمح بالثاني ضيقه
.............. يبدا يشرح كيف تهون

قالو ندرس شكل الارض
.............. ولا لفت بتلف شلووون

يا إمّا " جاليليو " صادق
.............. او شارب وقته الملعون

كل حاجه بالدنيا تفسّر
............... ومو لازم تفسيره يكون :

زي اللي رافع يدّينه
............... ويسأل ربّه بيض عيون

اطعم ما بالحب اسلوبه
............... ومجنونه تناقش مجنون !!

يا صبيييييييييح


يا صبيييييييييح


تعال وخذني من يدي

بتعلّم اوقف .. ما اطيح ..!


شفني ملّيت الأحاسيس وتعبت

تبغاني احلف .. هــه حلفــت !



ما عاد ابيني :

الطيّب / العفوي / الهْدي ..!؟

تقدر تخليني .. قبيـح ..!!








يا صبــيح

والطهر الأول في الزمن هذا شحيح

اتذكر امّي وقتها تنده عليك

اخذ اللي يزعّـل امّه

ويقعد يصيح ..!؟



واتذكر انه طبطبت صدري ومِلت

وهزّتني برجوله وقلت :

يمّه صبيح ربنا

يمّه صبيح ربنا

غطتني بجلاله وهي تضحك علي

وتقول لا لا ربك الله

بس انـّه مرّه يحبنا ..!؟

ويبغانا دايم نستريح ..!

وأنا اعيد ترتيب بعض الأشياء القديمه والتي احتفظ بها حتى الآن
لفت انتباهي ورقه سبق وان اخذتها من ابن عمّي يكبرني سناً وعشقاً
قبل حوالي 14 سنه قد رسم عليها وجه فتاة جميله إبتسامتها مشرقه
تضع شال على رأسها وتنظر الى الجهه اليمنى من الورقه
كتب في الأسف بخطّه الجميل :












اذكر انها ورقه من مجموعة اوراق تحمل نفس ملامح الفتاة
ونفس الأبيات السابقه .. ولكن بأختلاف طريقة الرسم .. !؟
اخذتها منه بعد جهد كبير ولأني كنت اظن انها وجه خيالي احبّه
وبدأ يلتقطه بطرق مختلفه ..

عدت بالذكرى !؟
عندما كان يتحدّث عن العشق وكيف انّه ببساطته الجميله وشخصيته
الرائعه يخلق من أي شي .. كل شيء ..!
لم اكن اعي حقيقة العشق او الحب في ذاك الوقت بحكم السن والنشأه
كنت اراه يتحدث مع الليل بصوت منخفض في بعض المرّات وامضي للنوم
والآن وبعد هذه السنين وكأن الورقه لم تتلف أو تضيع ..
لتجعلني اتحدّث مع نفسي عن حقائق عدّه وأفكار غريبه جداً
ادركت الآن انه كان يرسم حبيبته أو كما اعتقد
ادركت انه صدق قلبه فقد كانت غرفته مكتظّه برسومات لهذه الفتاة
والأبيات التي شدا بها ابو نوره ..
فهو كان يُهمل الرسومات الأخرى أو لا يُحس بها كأحساس رسّام بلوحه
هو كان مخلّداً نفسه لهذه الفتاة فقط

وجدت انّي احاكيني بصوت المتسائل :
ماذا لو قارنت بين احساسه سابقاً و احساسي الآن !؟

هل الرسمه ابلغ لأنه كان يجسّدها بعنايه واعتقد بنفس الملامح والإبتسامه
لأنه حتى قد بلغ منه ما بلغ عندما كان يبدع بكسرة السن الأماميه قليلاً .!
أم ان الشعر ابلغ وهو يجسّد اشياء اضافيه مصاحبه للملامح ..!

تغيّبت عن عملي لهذا اليوم حرصاً ان اذهب لزيارته فأنا على تواصل قوي معه ..
ولكن حرصي هذه المرّه لأن بصحبتي "رسمة الفتاة " وارغب في الحديث العفوي
وهو لا يمانع ابداً في ذلك .. اعرف تلقائيته جيداً !

عندما هاتفته وقال لي " هلابك انا بالبيت وبجهز القهوه "
قلت بس ترى جاي معي ضيفين !
قال منهم ؟
قلت " رسمه " و " 14 سنه مضت " ..!؟

ضحك كثيراً ثم قال :
تعال تعال واترك عنك هبالك .. وخل اشوف وشعندك
بخلّي عيالي ينقّزون فوق راسك ..!!!؟

عندما وصلت للبيت وفتح لي الباب كنت ممسك بالورقه حتى دخلت المجلس
وقلت له :
لماذا تركت الرسم ..!؟

استغرب من سؤالي قليلاً
ثم قال : سبق وأن قلت اني مللت منه ولم اعد ارغب بممارسته
عندها وضعت الورقه امام عينيه وقلت هل تحلف بالله انه لم يكن من اجل هذه ..!

الآن احسست بك جيداً
فأنا اشاطرك الإحساس ولكن نختلف بالهبه التي وهبنا الله اياها
ولكن جميعها موصّل مؤلم في العشق إن صدق ..*

ما جعلني احلف لك بأنه من اجل العشق تركت الرسم .
هو ذاته الشيء الذي من اجله اريد ان اترك الشعر ..*** !!

عندها اطرق رأسه وقعد مُلئت عينيه ماءً وقال :

يا مسافره

ما باقي في جسمي مكان ٍ ما احتراك

تعبت ضلوعي تجمع ايامي حنين لشوفتك

تبغى اخبيني بلقاك !!




وتعبت أقول بأعلى صوتي :

لحظاتي بعدك كافره

لحظااااتي بعدك كااافره

لحظاااااااتي بعدك كااااافره



يا مسافره

وكل البشر لا سافرو
ما خلّو للغيبه أثر
إلا انتي

المح صورتك في كل درب / كل بيت !

إلا انتي
أسمع همستك بشوووويش :

أحبك .. أحبك ..........أبيك ..!


وآخذ من أفكاري السهل

وأغمسني في الأشياء جهل

وألقى السوالف بعد ما كانت سوى

متنافره ..



يا مسافره

كنك خذيتي بشنطتك كل الرياض

* الشوارع
* المباني
* الأوادم
* البياض

وما باقي فيها حس أبد ..

متى على الله ترجعي
يوووووه متى بربك ترجعي

ودّي تشوفي هالحنين اللي بصدري حافره ..!


يا مسافره !

قولي لي والله هالخطا ما اعوده
............... وإن عدتّه مرّه ثانيه خمّني بكَف

والكَف في شرع المحبّين زوده :
............... إنّه شبيه البوسه او يمكن الطف

ياللي كبرتي عن المراييل كوده
............... يزهى عليك العمر ياشيخة الصف

بردت ضلوعي خففي ذا البروده
................. وإلا اتركيني مع نواياك التف

ما كنتي يومك تعشقيني محدوده
.............. وما كنت يومي اعشقك ناوي انحف

بعض الغلا لا صار شكّه يقوده
............... الكل منّا بيمرض .. وصعبه نخف

يا تاركتلي من الهدايا وعوده
................ من يوم فرقانا وانا عيني ترف !

والسفر .. والليل .. ونجوم السماء متناثره
............... يا كثر ما حطت بيديني .. قيد آمالي

يعني لو شبيت حبي .. والخطاوي عاثره
............... ظنك إنّي ما اشوفك بالطريق قبالي

يا اللي خليت الأماكن في حياتي : خاثره
............. ليت لي بين الضلوع لسان يحكي حالي

صح انّك منت همّ .. بمعنى هم أتكاثره
............... وصح إنّي رحت .. لكن والله انك غالي !

هذا وغيابك ما بعد كمّل اليوم
................. أحس صدري من السواليف ضايق

يالله حبيبي يكفي تمغّط ونوم
................. الصبح من لحظة تثاوبك فايق

الشوق كوم ولمحة بجامتك كوم
.................. ما تدري شكلك وقته شلون رايق

حاول تعزّم وأنا بنتظرك تقوم
.................. بس لا تأخر .. معك
















4 دقايق ..!!

يطول دقني تعب .. وأتأخر آجزه
............ وكل من سألني وراك .. آقوله طاااافي

ما شفت عيني وكل اشياءك تخزّه
........... أو شفت همي .. غدى رجّال متعافي !

تصدّق انّك تركت لسهوتي نزّه
.............. وتصدّق إنّك غديت تشكّل أوصافي

يجيني طيفك مابين الحزّه والحزّه
............ وأتعلّث إنّي مصخّن .. وانفض اطرافي

عشان اببقى بحضنك طفلك الرزّه
............ اللي يلاغيك " ماااماا ثوفي اتوقرافي "

مرات احسّك هوس عزيته معزّه
............. ومرات احسّك عشق تطهر به احلافي

فتّشت صدري أدوّر ضلع ٍ آهزه
............... يمكنّي القاك .. متظلل به وغافي

يكزني لك خفوقي وأرجع آكزّه
................ والكل منّا يبي يظهر لك الخافي

حشمة حبك وأنا لي حشمه تنزّه
.............. وأصبحت أعكك .. بدون آعلم اكتافي !!

هلا باللي نسي صوته بأذني البارحه وعوّد

............. يبي يسمع معي كل الكلام ويعترف زيي



هلابه كثر ما ازوّد غرامه والمحه زوّد

............. هلابه كثر ما يلعب بحسبة وقتي وغيي


قبل لا اقوله جاك الخفوق .. بذمّتك : جوّد

............ سبقني وقالي جوّد خفوقي : يا بعد حيي .!!

قلتها لك :



لا نويــت انـّك تحب

لا تعلـّم لو ظلالـك ..!؟

فاقد حبيب ولو عيوني يقرّن

............. ما قر قلب ٍ صارع البعد بإحساس !


من يوم جرحي سبعة ايام مرّن

.............. وانا ارد هموم صدري عن الناس


كل ما سليت احس شيٍ يجرّن

.............. واقوم اجر من الوجع كل هوجاس !


وانا اللي كنت احسبه باكر يبرّن

............... من كثر ما شلته وانا عاصب الراس


مرّات احس ايام عمري يفرّن

............... واقول : وشوله التعب دامني حاس


ومرّات اطرّي اشيا غصب يتطرّن

................. بعضه يفرّح واكثره هم و اتعاس !


م استْعيب ايام العشق .. لا تعرّن

................. لنّه انقسم ما بين قلبي و الأنفاس


استْعيب انّه يوم عـزّم يحرّن

................ وبكل بساطه : عدّني ابعد الناس .!

للعشق معنى وطلاسم .. لو تطاوله الدموع
............. إنبتت وسط المحاجر .. لعنه / وضيم / وألم !!

يا حبيبي شحيلة اللّي راح .. والنيّه رجوع
............. يعني ذنبه يوم عزّم يبتسـم .... راح يحلم !

لا تـذكّرني بربك .... دامـنا صرنا نجـوع
............. للعبث ... قبل نتعلّم .... نبري ضلـوع القـلم ؟

هات
نبضك

هات ...... هات !

من يقول انّي بقول بيوم

وقّف !




فيه احد












يبغى توّقف به الحياة !؟

لو ما عظيم الحب .. ما فار دمّي
....... ولو ما دليل الشوق .. ما جيتك اشكيك


لو منتي همّي .. منهو بالله همّي
......... وانا ضلوعي .. لا تمْـايلت .. تطريك


يا سدرة الشوق .. وتلاوين فمّي
........ يا شمعة ٍ يبطي البخت .. ما يطفـّيك


مرّات احسّك .. من براءتك .. امّي
........ واقول من كثر الغلا .. شلون اوفـّيك


الفرق : انّه.. من اوّل العمر.. يمّي
....... وانتي .. بآخر عمري ..اصبحت اناديك


هذي يديني .. بذمـّتك .. دوك شمّي
........ لا غبتي عنـّي .. اشمّها ريحة ايديك


اخاف بكرى..ان جيت باكل واسمّي
........ ياكل معاي العشق .. واخطي واسمّيك


وإن جاتك اشواقي تبعثرك.. لمـّي
........ لا تقولي انجنّ الولد .. صالح اشفيك !!

يا قلبي :

هه فز

هه فز

هه فز وتشجّع

يالله بعد

يالله تشجّع


ما راح :

صعب إنّه يرجّع


إمسحها هالمرّه بوجهي

ما عاد انا الأول أبد

أسكت إذا شفتك توجّع ..!

رساله من حديث أوسع :


في صبيحة هذا اليوم كان الحديث اللذيذ مع زميل قد تأخر الوقت بأحضاره لا بأس ولكن كان حقاً بمستوى الحضور عندما تجاذبنا الحديث حول مسألة " كان حديثاً يفترى " ..
سبقت بالقول ان عندما يكون الإنسان بطبيعة الحال صامتاً عن ما يقال فهو بلا شك الأكثر ارتياحاً إذا آمنا بأن كل ما حولك يختلف عنك وقد لا تتوافق إلا مع البعض .. لذلك اجد في أن التفسير في سلوكيات الناس أمر بغاية الصعوبه وبذات الوقت يُستطاع من خلاله التحديق في الطريق أكثر !
قال وهو الأكثر ضحكاً وتفويتاً : أن على الإنسان مراعاة ما يهمه وإجتناب ما لا يهمه حتى وإن مر بجدل ٍ حول سلوك إنسان ولكن أن يُتطرق إلى مسائل أكثر إيلاماً و فريه فذاك ما يقلق من مدى سلوكيات البشر في الفتره الأخيره ..

يا زميلي لما الغضب وأنا الذي قلت لك أن الإنسان عندما يبتلى بشيء ليس فيه فالذي ابتلاه قادر على أن يجعل له من امره يسرا .. وقادر على ان يجعل الحبل ملقى بجانب قدمي أي حديث مراد .. لست واعضاً دينياً ولابد أن تعرف اني عندما أذهب لبعض الأمور واطيل النظر بها أضحك كثيراً من فضاعتها لكون المفترض بها أن لا تحصل , فترى أن هناك من يحب شخصاً ويضع بدربه العراقيل .. وهناك من يحب شخصاً وتراه يفتري عليه ما قد تسقط السماء غضباً منه وبدافع أمر الحب وهناك شخصاً تجده يقتلع من يديه الشوك ليهبه ليد الآخر بدافع الحب ... الخ
السلوكيات التي تأطر بدافع الحب ما هي إلا جنون يمضغ العقل حتى لا يكاد يبقي به إلا ما يلفظه الفم ويأكله النمل وقد لا .
والكثير الكثير من ذلك لو اردت أن اسرد لك من السلوكيات ما قد يذهب عقلك .. وأنا هنا اتحدث عن السلوكيات بدافع الحب
والتي تبنى على باطل ولا يراعي بها مخافة الله أو الخجل من خلقه .. فأنا مهما أوجدت المسوغات لأفعال كهذه يختلف عِظمها من صغرها إلا انها تبقى مذمومه للشخص البعيد والذي ينظر من علو أو من مسافه قريبه بفكر أجمل لا فرق على المكان الذي ينظر به للأمر ..
يا أيها القريب من الصدق صدّقني أنه لا يوجد في هذه الحياة شيء يحزن عليه بقدر فراق الأحبه كأنتقالهم إلى دار أخرى
أما عدى ذلك من أمور الحياة فمن يريد أن يعيش مع هذا العالم المتغيّر بتغيّر سلوكياته والتي يعتقد بأنها الباعثه للحب يجد أن عليه أخذ نفس عميق قبل الغوص في أي أمر يظهر له في حياته ومن يريد الغوص لابد أن يحضر معه ( أسطوانة تنفس) و ( نظارات فوق معرفيه ) كي يستطيع أن يرتب نفسه كل لحظه ولا يغرق ..!
هناك أمر جميل وهو سعة الظن بالله مهما بلغ الخطب ومهما بلغت الأخطاء
"وتعلم أن ما أصابك لم يكن ليخطئك ، وما أخطأك لم يكن ليصيبك" لذا لا تقلق ..!

شكراً لك عليك عسى أن تبقيك الأيام بقرب و إخاء


تقديري و احترامي

سيقينا الماي .!
ما خذنا من افم الوقِت غير : لعان
وشتيمه : أنجبت أوطان !
وك شبيها الضلوع تفور
وأرقاب الحمام تدور
ضنّك خافت إمن الجاي

أو تباوع بقايا سور
وجسمٍ طاح ..
حجي هوايا .. حجي بـ الكان !



منو يسأل عن الـصاير
بكت هالأرض ..
ورحل طاير ؟
وبقى صوت الدموع يدق
من اللي يسمْعه و عايش
من اللي ما انقتل حاير
خطيّة صدق
خطيّه الـ كل بيها أنهان ..!!!

وقفت أراجع الذكرى سواليف وقصص وأحلام
.......... طواها الوقت .. يا خلّي .. ولا لي منّها حيله

أحسّ برسمها يملا فضاي وطيبها أنسام
........ ومن ظلم الزمن أسمْعه يقول شلون جيتي له

ضحكت وغورقت عيني بدموعٍ ملحها نهّام
........ وسكت من القهر وأزريت أحط الهم وآشيله

وقمت الملم جروح ٍ ورى حدب الضلوع تنام
........ ونزل ستر الظلام وجات لطروق الهوى ميله

وأعود أعود لايام ٍ مضت وأقفت وراه أيام
........والآقي بعضي اللّي غاب عن باقيه وأشكي له

إلى منّي ذكرت اللّي مضى واللّي بقى قدام
....... أقول الله يعييييين القلب من شي ٍ يبي يجي له

أنا حظي من الدنيا مثل حظي من الاوهام
........ أداري بالخفى جرحي وإلى من صاح أغني له .!!

الصباح اللي بلا صوتك :
يا عمري
مو
صباح

...... شوفي حتى ان العصافير .. هجرت شمسه وفيـّه !




كل ضلع ٍ
لا طريت اسمك :
تغافلني وطاح

...... كن ربي ما خلق بالكون .. لك غيري ضحيـّه .!؟

يا الحبيب









يااااا الحبيب










يااااااااااا الحبيب







اصحى !؟

شوف البرد سيّر

اليا متى بتبقى بمكانك

وكل ما حولك تغيّر


امس مرّيتك .. واحسّك مثل م انت

زي هالحين : ونسيتك !

إلا من بعض الغطا

وادري انّك تنتفض من حر مابك

ما تبي للغير منّه

ولا تبي رد العطا


قلت يمكنّك عقلت


قلت يمكنّك .. لقيتك !







وأثرك مثل همّك


غريب ..!؟

هذا الأول .. من شهر شعبان .. بيّن
........ الله اعلم .. وش طويت .. بهالشهر !؟

انجبرت اكذب على نفسي .. بهيّن
......... وانا ادري : هيّن .. آخرها سهر

العشق ( في خافقي ).. رجّال ديّن
......... ما يهمّه .. لو يغـربـله .. الدهر

يعني لو يدري بسرّي وش يزيّن
........ اعرف انّه ضعيّف .. ومملي طهر

لو كتمته .. ما وطيت الدرب ليّن
......... ولو بقوله .. زادني قولي .. قهر !

عارف اني بحالتيني وش بعيّن
........ دامي شاعر .. من جروحه اشتهر !؟

يومين مرّت .. وغصّه باثرها غصّه
........... كنّي آتجرع ... مرار الخوف بلساني

لو كل علم ٍ يجيك .... بينحذف نصّه
.......... ما كان اسكّر .. عن الايام .. بيباني !

ليتك يا بندر تحضن القلب وترصّه
........... يمكنّي اهدا .. اذا لهلمت أحزاني

ماهي بقولة ضلوعك افطن و وصّه
......... وانت تعرفني رهيّف قلب : ما اداني !؟

سلّم على اللي معاك وبالغلا خصّه
........... الله يعلم وش اللي بـ الصدر جاني !

الليله حسّك يا خفوقي عالي
تبقى رغم كل الحوادث عالي
والناس فيها اللي تحت والعالي
لا تامن احد وخل امانك بالله

O ~ O

يا كثر ما توقف وغيرك ماشي
وان قلت هونك قال نبضك ماشي
من الحقايق لو تفكّر ما شي :
يسوى تضيق وما يغيضك خلّه

O ~ O

راحت علي ايام مامن بينه
للي ترك ذكراه بيني وبينه
والنفس لوما اقتفاها بينه
ما قمت اطوي حاجتي ويفلّه

O ~ O

خلك كذا لا تلتفت للماضي
كم غرّتك دنيا تميض وماضي
ما قدّر المولى علينا ماضي
ذي سنة الله فـ الخلايق كلّه !!

عسى ما خلاف !؟

اشوفك طايح بنفسك معاتب

وإن سألتك قلت :

لو شفت اللي شفته

صار حالك .. مثل حالي

تخاااااااف


انا شفت اللي شفته ....
يمكن وأكثر !

انا ظهري من طعون الحبابه .. لو ابحسبها

بظل اعدد وتسهر !



لان لو بمسكه جرح ........... جرح
بيدي بسحب خياط الوجع

وافتح لك اللي طاف



وانت تحسب انت اللي تعاني بس

وغيرك جاف

ترى ما كل من يمشي خلوق وراكز

عايش ..!

ولكنّه رضى بحاله

يقينه يمكن اوحى له

بأن هذا الزمن كنّه : حصاه

وتنتظر طايش ..!


وترى ما كل من يضحك .. خليّ

وما لحقه خلاف !؟

ياللي على أدنى الأمور تأفف
................ امّا انك اهبل أو بطبعك آفه

ما كل كيال ٍ لزوم يطفف
................. يفرق بعضهم قولة الله عافه

ولا ينفع العينين دمع يكفف
.................. لا شفت ملحه نابت ٍ بـ اطرافه

ما قد سمعت بـ آدمي مجفف
................... لجل يتنفّس راح يلغي اوصافه

ما وقّف وناظر عساه يدفف
.................... وما مد رجله اطول من لحافه

وما قال شوفوني عشان يصفف :
.................... بعض الهموم اللي مداها تافه

يا لعنبو نفس ٍ بغير تعفف
.................... ويا لعنبو حكي ٍ كثير احلافه

واللي بخيص ٍ فـ الامور يخفف
................... شوفه قبل يستسخف اللي شافه !

ش عاد له ازعل وانا ممتلي صبر

................ ش عادله اشره وانا قافل الباب


عيب ٍ على مثلي ترى ومثلك يخبر

................. انّه يهز ّ رقبته إن هزّت أرقاب


تذبحني واسكت لا بعد تنتقي قبر

................. ودّك تأكد وش كرامات الأحباب !

مرّه اجي من لهفتي .. في مكانك

.............. ومرّه .. اشوفك في مكاني تجيني


من زود ما احس بولهك وحنانك

.............. اخاف انام .. وما تضمّك يديني !

ماني على خبرك إذا تهت أعاني
.................. أبشرك صرت اضحك إن زارني هم

يمكن تبلّد .. يمكن إنّه خذاني :
.................. اليأس من صدق البشر وأكثر الذم

من كثر ما حاس التناقض زماني
................... ما عاد ابيني الطيّب الممتلي دم

عزّمت ابصنع لي سفينه تحماني
................. والناس حولي وغايتي أركب اليم

خايف وزيز الغيم يصقه أذاني
................. وانا احفظ الأرض ودعابيسها صم

صرت أحسب ايام السنه بالثواني
................... اقلّه اعرف فاتني من السنه كم

وإن عوّد الحكي لطلبتك عشاني
.................. بقول خلّك من عشاني .. ورح نم

وش فادني يوم انصحك وتعصاني
.................. مابي يتولّج سيرتك : مرهي الفم

الناس ماله غير طهر الأماني
................ وأنا خذيت من الطهر أغلب الهم ..!

ودّي احبّك وأزرع بحبّك الغيم
.................. ورد ٍ مثل خدّينك .. وريح جسمك

منت بحلو واجد ولكنّك طخيم
................ والملح فاق الزين .. والموق رسمك

ملموم
وأهيف
وأكحل
وممتلي لحيم !
.............. والموت علكك للحكي .. ونطقك اسمك

جرّت عيونك تشبه الصاحي النيم
............... وإلا السوالف طير .. بشّر بوسمك

يا معلّم ٍ سرب القطا كيف الأفيم
............... يحجز زلال الماء .. ويغنيه قسمك

خايف أحبّك يلحقك بالهوى ظيم
.............. وخايف م احبّك .. وآتمايل لأسمك !