مواقف طريفة

[ناصر آل مداوي]

مساء الخير على الجميع

شباب نبغى كل واحد يعطينا له موقف طريف او قصة مضحكة :)

ويش رايكم؟؟؟

وبما اني صاحب الفكرة بابدأ

هذا مرة في يوم من الايام زمااااان :)

لا والله جد الحين:)

مرة يقول لي ابوي انا باسافر وانت عط الغنم يوم موية ويوم شعير لا تعطيها موية وشعير في نفس اليوم

قلت ابشر :)

سافر وانت متطمن

والله واروح للزريبة واعطي الغنم شعير والغنم تسمع صوتها وصياحها على بعد كيلو ضميانة تبغى تشرب

يا ولد تسقيها والا لا:)

بعدين قررت اسقيها والله واصب لها موية وتشرب

وثلاثة ايام على هذا الحال شعير وموية

ويرجع ابوي من السفر:)

يقول هاه سويت اللي قلت

قلت افا عليك ارقد بنومك كل شي على ما يرام:)

قال زين

ويوم يدخل الزريبة :D:D

ويشوف الارض كلها وانتوا بالكرامة.......:)

وخروفين مسدحة و بطن كل واحد مثل البرميل واقسى من الحجر

انا شفتها والا ما شفتها احط غترتي على كتفي وادور الباب عشان اهرب:)

وهو يطرد يطرد (توم وجيري) لكن ضيعته ولا قدر يمسكني

وثلاثة ايام جالس عند عمي وابوي يدورني ما يدري وين انا ويسأل عمي شفته يقول لا ما شفته (سنافي عمي ذا وانا عنده في بيته):)


المهم
اخوي يدرس في الرياض وجاي عندنا في اجازة الصيف ويذبح له ويعزم الناس

ويوم يسري الناس يروح اخوي من قرادته ينام في سريري ويغطي نفسه كامل حتى راسه

وينزل ابوي لشقتي يشوف يمكن جيت:):)

يوم يشوف اخوي في فراشي ومغطي راسه يفرح وينبسط يقول هذا ناصر

وبسم الله يرد لعقاله اقصد الكفر اللي فوق راسه وهات لك من الضرب

وابوي يضرب واخوي ما تحرك

يقول ابوي لا يكون الولد مات

يوم يرفع البطانية

يتفاجأ انه اخوي ما هو انا اللي كان يضربه

ههههههههههههههههههههههههههه

واخوي حالته حالة ومغوم:D:D

ويصحي المسكين ويجيب موية ويغسل وجهه:):)

ويتأسف له ويشرهه مية ريال:(

واليوم الثاني يعلم عمي ابوي اني عنده

ويتصل علي عند عمي يقول خلاص ارجع البيت اخوك انضرب بدالك:D:D

ويوم ارجع اشوف وجه اخوي فيه حالة

خريطة العالم كلها في وجهه:):)

قلت والله المفروض تعطيه مية الف ما هو مية ريال على اللي سويت في وجهه:):)

يوم اقول كذا يرد للعقال ويجلد فيني لين تفلت التوبة:)












والسلام ختام:)

وادري اني اسلوبي في السرد ممل لكن الله يعينكم

تحياتي،،

[راعي العنود]

السلام عليكم ..........

اخوي :ناصر الوادعي ........................أرحب تراحيب المطر يالذيب

يوم شفت مواقف جيت أبسفط أحسبه مواقف سيارات ;)

لي عوده للموضوع..............

[عبدالله مران]

حتى انا لي عوده للموضوع يعني بس انت يا راعي العنود

[فيصل الخالد]

ناصر
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههه

عسل يا ناصر

ومسكين اخوك ما سوت عليه الشرهه بس 100 ريال

طيب اقولكم موقف صارلي وباختصر لاني خابر نفسي راعي هذره

المهم الموقف هذا عقدني الى اليوم وماني قادر انساه ومن بعدها العيال معلقين علي

فيصل قلب الاسد لاني طبعا وريتهم اني شجاع كثير



رحلة مصر
قبل ما اشيب كنت اروح مصر كثير يعني تمشيه مع العيال في ما يرضى الله

المهم كنت متعود انزل بفندق وما عمري نزلت بشقه مره من المرات قالي اخوي الكبير خذ اخوك الصغير معك هو ويا خويه يبون يروحون وانا خايف عليهم يروحون بلحالهم

قلت له سم وابشر

خذتهم وانا طبعا الكبير الي معاي القطيه والي فاهم ولا ينضحك علي

قالوا لي ما نبي فندق نبي شقه --- مبيتين نية شر الظاهر بس جت على راسي- - قلت لهم اوكيه يسلم راسكم ورحت ثاني يوم وصلونا وجبت لهم فول وجرير ودورت لهم على شقه يوم جينا نوقع العقد قالت راعية الشقه كم تبونها قلت شهر قال اخوي وخويه خلنا ناخذها بس اسبوع ونشوف يمكن ما تجوز لنا قلت لهم

انا لالالالا لا تتكلمون بشي انتوا مو فاهمينه روقوا وانا باتصرف – وليتني ما تصرفت – قالوا لي سم على بالهم اني خبير الحين وفاهم هاللكيع – المهم دفعنا لها لشهر ووقعنا العقد وطلعت هي قلت لهم يالله ارويكم الاهرامات بدلوا – الشباب كانوا الى هذيك اللحظه معطيني وجه ومحترميني – وهم يبدلون جت الشغاله وقالت لي اعمل شاي يا بيه قلت لها بالخمسينه باوريها على بالي اني واد فتك المهم شوي الا اشوف شي يركض وررررررررررررررر صرخت باعلى صوتي فار - الله يكرمكم - قالت لي والله ما فار دي قطه انا مربيها قلت طيب شوي الا شي ثاني يركض بس المره هذه اسود ورررررررر قلت انا فارررررررررر قالت والله ما فار دي اختها انا مخلفها صدقت وقلت يمكن عيوين مغبشه طلعنا ورجعنا اخر المغرب والعيال بدلوا بيرحون حفلة

وانا قلت لهم تعبان روحوا انتوا انا باروح اتعشى وارجع انام

رجعت والا اشوف القطاوه تصوصو ومدهره ركض ورى بعض قال قطه قال – المره هذه شفت اربعه ويلعبون درياهو – وانقز من الخوف لاني طول عمري عندي حساسيه من الفيران الله يركمكم

يعني اقابل اسد ولا اقابل هالمخلوق المقرف – المهم من الخرعه مادريت وش اسوي حطيت لي كرسي بنص الصاله ووقفت عليه بزعمي العيال بيجون ويشفون لهم حل – الله يسامحهم ما رجعوا الا الساعه اربعه وانا من العشاء للفجر وانا واقف على الكرسي رجعوا وماتوا علي من الضحك قالا وش عنده ابو الهول – حذفت لهم قطيتهم بوجيهم وقلت لهم ان بغيتوني انا بالفندق وخلني اشوفكم معلمين احد عن هالموقف والله ما اسفركم معاي مره ثانيه


---- قال اسفركم قال من بعدها وهم جاحديني وصاروا يسافرون من وراي وما يبوني اجي معهم


وسلامتكم

[ناصر آل مداوي]

هلا اخوي راعي العنود

الله يبقيك

مواقف سيارات:):)

حلللللللللللوة:))

بانتظارك لا تبطي;)

[ناصر آل مداوي]

هلا بالغالي عبدالله مران

شكلك كنت بتقول موقف

بس يوم تشوف راعي العنود يقول لي عودة

قلت خلني اكتب مثله:):):)

ههههههههههه

ترى امون شمام:)

بانتظارك عودتك يالغالي

[ناصر آل مداوي]

هلا بالغالي فيصل بن خالد

ههههههههههههههههههههه
هههههههههههههههههههه

والله حلوة :):)

اجل تخاف من الفيراااااااااااااان:)

اما يوم تحط كرسي في نص الصالة وواقف عليه لي الفجر

تعذييييييييييييييييييب:):):)

الواحد يسافر ينبسط وانت تسافر تتعذب
ههههههههههههههههههههههههه

مشكور والله يالغالي على الموقف الجميل

واذا فيه غيره هات مانكره

تحياتي
اخوك

[فيصل الخالد]

المواقف كثيره بس اخاف تعلقون علي


خبرك انا الحين ناوي ارشح نفسي للانتخبات الجايه في رئاسة المنتدى واخاف الاخبار هذه تستغل ضدي


تعرف المشاهير الي زينا دائما كذا بس اصبر لين ما اخسر رسمي وانا اطهبلها


==== اطهبلها - فعل طهبله والجمع طهابيل والمذكر طهبل والمؤنث طهبلتها

عقدت عمري يا شيخ القواعد

وتحياتي