يا شير طلوا .. مداعبه [الارشيف]

عرض كامل الموضوع : يا شير طلوا .. مداعبه

متعب الخامسي

23-11-2005, 03:12

كل عام وانتم بخير بعد الزحمه :)

هذي ابيات مداعبه قلتها للاخ شير طلوا قبل ايام بعد ماحصلت بعض المناوشات في جنوب لبنان .

وسمعها بعض الاصدقاء وطلوبني انزلها

وقلت غالي والطلب رخيص <- يسمع بالمقدمات :white:

سالفة القصيدة موقف طريف صار لشير طلوا حدثني عنه وقلت له هذه الابيات مجرد مداعبه

حدثت لها بعض التعديلات السريعه والي حاست الدعوى شوي لكن وش نسوي لزوم النشر :white:

اقول :

بعض البشر مايستحق الحشيمه = وقاحته تعكس دناءة نواياه

منحط والمنحط مافيه شيمه = وجهه يشابه فالمواقف مقفاه

ياشير طلوا لك فعولن قديمه = من يعترض دربك برجلك توطاه

لاتحسب حساب العقول السقيمه = من ضيع دروبه نحده على اقصاه

بعض البشر ياخوك مثل البهيمه = لامن كرشته زان طبعه وممشاه

والي في عقله عاهة" مستديمة = ياقرب والله يالسنافي معشاه

يجيك طايش يحسب إنك خصيمه = ويروح والضيقه تطوق حناياه

ياصاحبي في عصر ( يامه نعيمه ) = عصر انحطاط الفكر واللامبالاه

صار الكلام الشين حاجة عظيمه = فعيون من يؤمن بمعنى المساواة

وصار المخالف مايهاب القسيمه = يبلاك في نفسك عسى الله يبلاه

لذا الردي لاجاك حطه وليمه = احذر تحشمه لعنبو ساس مجناه

العفن لو تغسله عشرين غيمه = وشلون ينظف دام الاوساخ جواه

مال الردي بين الرجاجيل قيمه = لوكبرت علومه وكثـَرت حكاياه

ومن ضيع دروب الرجال الفهيمه = يبشر بوسم الخامسي فوق علباه

حسن آل مسفر

23-11-2005, 04:50

صح لسانك مليوووووووووووووووون يامتعب

العفن لو تغسله عشريـن غيمـه **** وشلون ينظف دام الاوساخ جواه

الله المستعان

عيني عليك بارده يابعدي

خربوش ابوخطمه

25-11-2005, 16:27

بعض البشر ياخوك مثل البهيمـه.............لامن كرشته زان طبعه وممشـاه

والي في عقله عاهة" مستديمـة...........ياقـرب والله يالسنافـي معشـاه

يجيك طايش يحسب إنك خصيمـه...............ويروح والضيقه تطـوق حنايـاه

متعب ياحلوووو قصيدك ياااااااااااااخي.
والله والله اني متابع لابياتك استمر وعليك ببوح القوافي تكفىى :)
صح لسااااااااااانك ياعزيزي.

شير طلوا

29-11-2005, 05:37

الحبيب متعب الخامسي

صح لسانك قصيدة جزله

وفيها من الحكم الشى الكثير

بعض البشر مايستحق الحشيمه = وقاحته تعكس دناءة نواياه

منحط والمنحط مافيه شيمه = وجهه يشابه فالمواقف مقفاه

وفيها من وصف الفرسان ما حاز على اعجابي :rolleyes:

ياشير طلوا لك فعولن قديمه = من يعترض دربك برجلك توطاه

ابيات تطرب لسامعها وقاريها

مال الردي بين الرجاجيل قيمه = لوكبرت علومه وكثـَرت حكاياه

ومن ضيع دروب الرجال الفهيمه = يبشر بوسم الخامسي فوق علباه

اعجبني البيت الاخير وبقوه :)

صح قلبك

لك كل المتابعه والتقدير

جود الرياض

29-11-2005, 21:48

صح لسانك اخوي متعب

كلمات قويه tsh5

خاصه

العفن لو تغسله عشريـن غيمـه... وشلون ينظف دام الاوساخ جـواه

مال الردي بين الرجاجيـل قيمـه... لوكبرت علومه وكثَـرت حكايـاه

ومن ضيع دروب الرجال الفهيمـه ...يبشر بوسم الخامسي فوق علبـاه

جـــــود

فيصل الرويس

13-03-2006, 20:06

صح لسانك

يجب أن يكون الشاعر ديكتاتور لا يرحم في تناوله للسلبيات التي يراها في الحياة , فمثل هذه القسوة يحتاجها الناس في "عصر إنحطاط الفكر واللامبالاة " .

روحك جميلة جداً ومرحة :
أعتبرني من ضمن جمهورك , حتى وإن كان صاحبك حداثي النزعة ولكن مُضري الصولة . بدأت أشعر بغثاثة شعراء التطبيلة الفصحي خصوصاً بعد الأحداث الأخيرة على المستوى العام , لا كلام عربي صح , ولا معاني جزلة , ولا حكمة . بربسة ... في بربسة "فعيون من يؤمن بمعنـى المسـاواة" .

هكذا شعر يلامس وجداني بصدق ويجعلني أتماهى مع الفكر الذي ينشده .

مع فائق إحترامي .